Oraldyqtar balalaryn mektepke jibermei otyr. Olar sanatoriialyq bilim oshaǵyna aýysýǵa narazy. Ata-analardyń aitýynsha, onda týberkýlezge shaldyqqandarmen bailanysta bolǵan balalar bilim alypty, - dep habarlaidy Tengrinews.kz "Astana" telearnasyna silteme jasap.
Telearna málimetinshe, ata-analar mektep basshylyǵynyń mundai sheshimin quptamai otyr.
"Meniń bilýimshe, Koh taiaqshasy jer betinde 40 jyl tirshilik etedi. Buryn osynda oqyǵan balalar jyl saiyn em qabyldady. Ǵimarattyń edenine aǵash tóselgen, linoleými de eski. Oiyn balasy júgirmei turmaidy. Sol kezde shań kóterilip, aýrý qos ókpeden qysa ma dep qorqamyz", - deidi qala turǵyny Larisa Nizovtseva.
Narazy top balalaryn mektepke jibermeýge osyndai qorqynysh sebep bolǵanyn jetkizdi. Búginde olar jaýapty oryndardyń tabaldyryǵyn tozdyryp júr. Ǵimaratqa zararsyzdandyrý jumystaryn júrgizip, kúrdeli jóndeý jumystaryn talap etedi.
"Balamdy bul mektepke jibermeimin. Áýeli durystap jóndeý jasasyn, topyraqty da óńdesin. Bul jerde qandai aýrý buǵyp jatqanyn kim biledi? Buǵan deiin bul arnaiy mektepke kirýge bolmaidy deitin. Endi kelip osynda bala oqytamyz deidi. Bul qai sasqandary?", - deidi qala turǵyny Jasulan Muqanov.
Bilim bóliminiń ókilderiniń sózinshe, oqýshylardy sanatoriialyq mektepke amalsyz kóshirilgen. Sebebi olar osyǵan deiin oqyǵan 700 oryndyq mektepte, qazir bala sany 2300-ge jetken. Úsh aýysymmen bala oqytý qiyndyq týdyrǵan soń myńǵa tarta oqýshyny bólip jiberý tiimdi dep sheshken.
"Birinshiden, ol mektepte týberkýlezben aýyrǵan balalar bolǵan joq. Ekinshiden, ol mektepte týberkýlezben aýyrǵan bala bolyp, taiaqshalary edende qalatyn bolsa, oblystyq sanepidemiologiialyq, oblystyq týbdispanser bizge ruqsat bermes edi. Olar ózderi jaýapkershilikti alyp, bizge ruqsatyn berip otyr", - deidi Oral qalalyq bilim berý bóliminiń basshysy Aqjarqyn Temirhanova.
Bilim berý bóliminiń dereginshe, balasyn mektepke jibermei otyrǵan ata-ana sany saýsaqpen sanarlyq qana. Olarmen endi túsindirý jumystaryn júrgizip kórmek. Oqý jyly bastalyp ketse de, máseleniń qalai sheshileri ázirge beimálim.
