Oralda áskeri bólimge shabýyl jasaýdy josparlaǵan terroristik top múshelerine úkim shyqty, dep habarlaidy QazAqparat tilshisi.
BQO qylmystyq ister jónindegi mamandandyrylǵan aýdanaralyq sotynan túsken málimetke qaraǵanda, J.Eskendirov, A.Ismýrzin, T.Karchegenov, E.Baltabaev, N.Aitbolatov, S.Tilekbaev, R.Jastalapov jáne kámeletke tolmaǵan Q.Birǵaliev aiypty dep tanyldy.
Sot talqysynda belgili bolǵandai, 2018 jyldyń qańtar-sáýir ailarynda J.Eskendirov Oral qalasynda «salafi jihad» baǵytyn ustanatyn, dini radikaldyq kózqarastaǵy A.Ismýrzin, T.Karchegenovpen tanysyp, Siriiaǵa barmai-aq, Oral qalasynda quqyq qorǵaý organdary men áskerilerge qarsy qarýly jihad, iaǵni terrorizm aktilerin jasaý úshin uiymdasqan terroristik topqa (jamaǵat) birigý jaily aqyldasyp, top qurǵan.
Osy maqsatta olar mamyr aiynda topty kúsheitý maqsatymen E.Baltabaev, N.Aitbolatov, S.Tilekbaevtyń qatysýymen basqosý jiyndaryn uiymdastyryp, jihad jasaimyz dep, ýaǵyzdar júrgizip, dini alaýyzdyqty qozdyryp, terrorizmdi nasihattaǵan.
Keiin jalǵa alǵan páterge jinalyp, dini áńgime qozǵap, Abai politsiia bólimine basyp kirip, jaryp jiberý jóninde aitqan.
Osylaisha J.Eskendirov, T.Karchegenov, A.Ismýrzin islam dinine jańadan bet bura bastaǵan, dini bilimderi joq E.Baltabaev, N.Aitbolatov, S.Tilekbaev, R.Jastalapov jáne kámeletke tolmaǵan Q.Birǵalievti terroristik top quramyna kirgizgen. Maýsym aiyndaǵy jiynda J.Eskendirovti ámir retinde sailaǵan.
Onymen qoimai, J.Eskendirov belgisiz tulǵadan sholaq ańshy myltyqtaryn oq-dárisimen satyp alyp, páter ishinde onymen qalai atý kerektigin top músheleri bir-birine kórsetip, úiretken. Aqyry maýsym aiynyń sońynda olar Oral qalasynda ornalasqan politsiia bólimine, 5517-áskeri bólimine jáne UQK departamentiniń ǵimaratyna kútpegen jerden shabýyl jasaý jóninde sheshimge kelgen.
25 maýsym kúni QR UQK BQO boiynsha departamenti qyzmetkerleri terroristik toptyń qylmystyq is-áreketin áshkerelep, ustalyp, olardyń kózdegen maqsaty iske aspady.
Sonymen, sot úkimimen 25 jasar J.Eskendirov pen 35 jasar A.Ismýrzin QR QK 174-baby 3-bóligi (qylmystyq toppen jasalǵan dini alaýyzdyqty qozdyrý), 256-baby 2-bóligi (terrorizmdi nasihattaý), 259-baby 2-bóligi (terroristik áreketti uiymdastyrý maqsatynda kámeletke tolmaǵan adamdy azǵyryp kóndirý), 287-baby 5-bóligi (qylmystyq top quramynda qarýdy zańsyz iemdený, tasymaldaý, saqtaý), 257-baby 1-bóligi (terroristik topty qurý, oǵan basshylyq etý), 24-baby 1-bóligi jáne 255-baby 4-bóligine (terroristik aktiler jasaýǵa daiyndalý) sáikes aiypty dep tanylyp, árqaisysyna túpkilikti 13 jyl bas bostandyǵynan aiyrý jazasy kesildi. Sol sekildi 52 jasar T.Karchegenov QK 174-baby 3-bóligi, 256-baby 2-bóligi, 259-baby 2-bóligi, 257-baby 1-bóligi, 24-baby 1-bóligi, 255-baby 4-bóligimen aiypty dep tanylyp, ol túpkilikti 12 jyl 6 ai merzimge bas bostandyǵynan aiyryldy.
19 jasar E.Baltabaev pen 20 jasar N.Aitbolatov QK-niń 174-baby 2-bóligi (adamdar tobymen aldyn ala sóz bailasyp, qasaqana dini alaýyzdyq qozdyrý), 256-baby 2-bóligi, QK-niń 257-baby 2-bóligi, 24-baby 1-bóligi, 255-baby 4-bóligimen aiypty dep tanylyp, bul ekeýine QK-niń 55-baby 4-bóligin qoldaný (belgili bir quqyq buzýshylyq úshin kózdelgen jazadan góri neǵurlym jeńil jaza taǵaiyndaý) arqyly túpkilikti 5 jyl bas bostandyǵynan aiyrý jazasy taǵaiyndaldy. 21 jasar S.Tilekbaev QK-niń 257-baby 2-bóligi, 24-baby 1-bóligi 255-baby 4-bóligimen aiypty dep tanylyp, QK-niń 55-baby 4-bóligin qoldanylyp (belgili bir quqyq buzýshylyq úshin kózdelgen jazadan góri neǵurlym jeńil jaza taǵaiyndaý), oǵan túpkilikti 3 jyl bas bostandyǵynan aiyrý jazasy taǵaiyndaldy. 18 jasar R.Jastalapovqa QK-niń 257-baby 2-bóligi, 24-baby 1-bóligi, 255-baby 4-bóligi men 55-baptyń 4-bóligi qoldanylyp, túpkilikti 5 jyl bas bostandyǵynan shekteý jazasy kesildi.
Kámeletke tolmaǵan 16 jasar Q.Birǵalievke QK-niń 257-baby 2-bóligi, 287-baby 5-bóligi, 24-baby 1-bóligi, 255-baby 4-bóligi men 55-baptyń 4-bóligi qoldanylyp, túpkilikti 2 jylǵa bas bostandyǵy shekteldi.
