Oral qalasyna eldi meken turǵyndarynyń kelýine shekteý engizildi. Bul týraly búgin Úkimet otyrysynda Batys Qazaqstan oblysynyń ákimi Ǵali Esqaliev aitty, dep habarlaidy "Ult aqparat".
«Sońǵy aptada oblysta aýrýdyń 1 067 jańa jaǵdaiy tirkelip otyr. Ótken aptamen salystyrǵanda aýrý kórsetkishiniń 20 paiyzǵa tómendegendigi baiqalady. Aýrýǵa shaldyqqandardy anyqtaý maqsatynda oblystaǵy 13 zerthanada táýligine 2 myńnan astam PTR testileý jasalady. Oblys «qyzyl» aimaqta 1 aidan astam ýaqyt bolǵanyn eskere otyryp, karantindik shekteý is-sharalary kúsheitildi. Meiram kúnderi eldi mekenderdegi turǵyndardyń oblys ortalyǵyna kelýin azaitý maqsatynda Oral qalasynda jáne «qyzyl» aimaqtaǵy 6 aýdanda 1 mamyrdan bastap 21 blokbeket ornatyldy», - dedi ol.
Onyń atap ótýinshe, bul shekteý túri biznes sýbektileriniń jumysyna kedergi keltirmeidi. Atalǵan blokbeketterdiń jumysy stopcovid.kz saity jáne «109» qyzmeti arqyly tolyqtai avtomattandyrylǵan.
«Bul is-sharalar oblys ortalyǵyna qatynaityn turǵyndar sanyn 35 paiyzǵa deiin azaityp, adam kóp jinalatyn is-sharalardy qysqartýǵa múmkindik berip otyr. Monitoring toptar kúndelikti reidterin jalǵastyrýda. 1 sáýirden beri monitoring top músheleri 665 ret reidke shyǵyp, 3,5 myńnan astam nysandy tekserdi. 12 meiramhananyń jumysy 3 aiǵa toqtatyldy. Sońǵy aptada 1,9 mln teńgege 34 hattama toltyryldy», - dedi Ǵali Esqaliev.
Sonymen qatar ol óńirde vaktsinatsiialaý jumysy qarqydy júrgizilip jatqanyn, oblysqa vaktsinanyń 84 myń dozasy jetkizilip, 1 komponentimen 45 205, ekinshi komponentpen 14 593 adam ekpe alǵanyn aitty.
