Oral-Aqtóbe jolynda jáne Oral-Samara, Oral-Saratov joldarynyń qazaqstandyq ýchaskelerinde pilottyq rejimde 3 baqylaý arkasy jáne klienttermen jumys isteitin ortalyq ornatyldy, dep habarlaidy "Ult aqparat" «QazAvtoJol» ulttyq kompaniiasyna silteme jasap.
Batys Qazaqstan oblysynyń Oral qalasy men Terekti aýdanynda aqyly avtojol jelisin keńeitý máseleleri boiynsha qoǵamdyq tyńdaý ótti.
Aqyly avtojoldardyń taqyryby BQO úshin ózekti. Reseidiń Samara jáne Saratov baǵytyndaǵy halyqaralyq mańyzy bar eki tas jol, sondai-aq Oral men Aqtóbeni bailanystyratyn joldan aqy alynatyn bolady. Aita ketý kerek, jol júrý aqysy tek kommertsiialyq júk kólikterinen alynady, jeńil kólikterge tegin.
Úsh avtotrassada jol qozǵalysy qaýipsizdiginiń joǵary deńgeiin jáne jolǵa, onyń jabynyna, infraqurylymǵa turaqty qyzmet kórsetýdi qamtamasyz etýge múmkindik beretin baǵdarlamalyq-apparattyq keshen testilik rejimde iske qosylady.
«QazAvtoJol» UK» AQ ókilderi Oral qalasy men Terekti aýdanynda ótken qoǵamdyq tyńdaýlarda qaýipsizdikti qamtamasyz etýdiń jańa júiesiniń barlyq jańalyqtary men jumys qaǵidattary týraly túsindirip berdi.
Mamandar aqyly jol ýchaskeleri qaýipsiz, únemi jóndeletinin jáne jol tósemi men jol boiyndaǵy servistik qyzmeti ózge joldarǵa qaraǵanda sapaly ekenin atap ótti.
Atalmysh joldardaǵy arkalarda joǵary jyldamdyqty kamera arqyly avtomobilderdiń jyldamdyǵy men sany, joldaǵy jaǵdai jáne t. b. tirkeledi.
Jolda turaqty tólem beketi bolmaidy, onyń ornyna yńǵaily «ashyq» tólem júiesi qoldanylady. Kedergi qoiylmaǵandyqtan, jol boiynda keptelister bolmaidy, bul qosymsha qaýipsizdikti qamtamasyz etedi jáne sapar ýaqytyn qysqartady.
Jol júrý aqysy qolma-qol aqshasyz tásilmen jáne aldyn ala tólem boiynsha júrgiziledi.
Batys Qazaqstan óńirindegi 3 kúre jolda júrý aqysy tek kommertsiialyq júk kólikterinen alynatyn bolady. Jinalǵan qarajat joldyń ózin-ózi qarjylandyrýyn ǵana emes, sonymen qatar joldaǵy qaýipsizdiktiń joǵary deńgeiin ustap turatyn óziniń servis kórsetý qyzmetin de qamtamasyz etedi.
Aita ketsek, aqyly joldar aimaqtyń kóptegen turǵyndaryn turaqty jumyspen qamtamasyz etedi. Sebebi qaýipsizdik pen beinetirkeý júielerin ornatý jáne qyzmet kórsetý, sondai-aq patrýldeý, jol jabyny men jol boiyndaǵy infraqurylymdy tazalaý jáne kútýge qyzmetkerler aqyly jol ashylǵan qala, aýdan aýmaǵynan ǵana alynady.
