Kabo-Verdede balalar men jasóspirimder mingen avtobýs joldan shyǵyp ketip, shamamen 30 metr tereńdikke qulady. Jantúrshigerlik jol apatynan 25 adam qaza taýyp, 13 adam aman qalǵan, dep habarlaidy ult.kz.
Oqiǵa 5 qyrkúiek kúni Fogý aralynda bolǵan. Avtobýs Cha-dash-Kaldeirash eldi mekeninen Kampanash-de-Sima baǵytymen kele jatqan. Jolaýshylar ekskýrsiiadan úilerine qaityp bara jatqan.
Aldyn ala málimet boiynsha, avtobýs taýly joldyń bir bóliginde basqarýdan shyǵyp, jol jieginen tómen qarai qulaǵan. Kólik shamamen 30 metr biiktikten jartasty shatqalǵa túsip, qatty zaqymdanǵan. Apat ornynyń taýly ári jetýi qiyn bolýy qutqarý jumystaryn kúrdelendirgen.
Qaza tapqandardyń basym bóligi — balalar, jasóspirimder jáne jastar. Olardyń arasynda bastaýysh jáne orta mektep oqýshylary bolǵan. Avtobýs júrgizýshisi de qaza tapqandardyń qatarynda.
Bastapqy aqparatta avtobýstaǵy adamdardyń naqty sany men qaza bolǵandar sany ártúrli kórsetilgen. Keiingi jergilikti málimet boiynsha, kólikte 38 adam bolǵan: 25 adam qaza taýyp, 13 adam aman qalǵan.
Qazir apattyń naqty sebebi anyqtalyp jatyr. Bilik oqiǵany jan-jaqty tergeýge kirisken. Bilim ministrligi bul sapardy mektepterdiń ózderi uiymdastyrmaǵanyn málimdedi. Ekskýrsiiany oqýshylardy oqý jyly kezinde tasymaldaityn júrgizýshi jeke uiymdastyrǵan.
