Qazaqstan mektepterinde qoldanylyp júrgen oqýlyqtar men oqý-ádistemelik keshenderde 700-den astam túrli sipattaǵy eskertpe men qate anyqtalǵan. Osyǵan bailanysty Oqý-aǵartý ministrligi oqýlyqtardy kezeń-kezeńimen jańartyp, bilim berý uiymdaryn jańa basylymdarmen qamtamasyz etýdi josparlap otyr, dep habarlaidy ult.kz.
Premer-ministrdiń orynbasary, Qazaqstan Respýblikasynyń Mádeniet jáne aqparat ministri Aida Balaeva sońǵy ýaqytta mektep oqýlyqtaryn jańartý máselesine qatysty qoǵam tarapynan kóptegen saýaldar túskenin málimdedi.
Onyń aitýynsha, anyqtalǵan kemshilikterdiń qatarynda tehnikalyq jáne stildik qateler, derektik dálsizdikter, mazmunǵa sáikes kelmeitin illiýstratsiialar, oqý baǵdarlamalarymen úilespeitin materialdar, sondai-aq eskirgen ádis-tásilder men tujyrymdamalar bar.
Ásirese ulttyq mazmunǵa beiimdelmegen materialdardyń paidalanylýy, matematika pánindegi qate anyqtamalar men esep shyǵarý tásilderi, oqý baǵdarlamasynda qarastyrylmaǵan shyǵarmalardyń engizilýi jáne tarihi oqiǵalarǵa qatysty jańsaq paiymdar alańdaýshylyq týdyryp otyr.
Ministrdiń málimetinshe, keibir oqýlyqtar belgilengen merzimde qaita qaralmai, toǵyz jylǵa deiin eleýli ózgerissiz qoldanylǵan. Sondyqtan oqý basylymdaryn ýaqytyly jańartý oqýshylardy sapaly ári zamanaýi bilim mazmunymen qamtamasyz etýdiń mańyzdy sharty bolyp sanalady.
Sonymen qatar Aida Balaeva bul bastama buryn oqýlyqtardy maquldaǵan pándik saraptama komissiialarynyń sheshimderiniń kúshin joiýdy kózdemeitinin atap ótti. Onyń sózinshe, másele bilim berý sapasy úshin ortaq jaýapkershilikti kúsheitýge baǵyttalǵan.
Josparǵa sáikes, 2026 jylǵy 30 tamyzǵa deiin 3 jáne 7-synyptarǵa arnalǵan oqýlyqtar, 2027 jylǵy 1 qańtarǵa deiin 4 jáne 9-synyp oqýlyqtary, al 2027 jylǵy 1 sáýirge deiin 8-synypqa arnalǵan oqý basylymdary jańartylady.
Vitse-premerdiń aitýynsha, negizgi maqsat – Qazaqstan mektepterin mazmuny muqiiat saralanǵan, memlekettik bilim berý standarttaryna sai, zamanaýi ári sapaly oqýlyqtarmen qamtamasyz etý.
