© Photo: SS0 / congerdesign
Densaýlyq saqtaý ministri Ajar Ǵiniiat Almaty oblysynda ógei naǵashy atasy qorlaǵan 3 jasar egiz qyz ben Almaty qalasynda zorlanǵan 7 jasar oqýshynyń jaǵdaiy týraly aitty, - dep habarlaidy "Ult aqparat" Tengrinews.kz saityna silteme jasap.
"Balalardyń jaǵdaiy ortasha aýyr. Olar meditsina qyzmetkerleriniń baqylaýynda. Bul balalardy qabyldaý kezinde bizdiń meditsina qyzmetkerleri eresekter tarapynan zorlyq-zombylyq áreketteri bolǵanyn anyqtady. Qabyldaý bóliminde balalar der kezinde tolyq tekserilip, quqyq qorǵaý organdaryna habarlandy. Alǵan jaraqatyna qarai balalarǵa ota jasaldy. Búginde olardyń ómirine qaýip tónip turǵan joq, balalar baqylaýda", - dedi Ajar Ǵiniiat OQK-da ótken brifingte.
Sondai-aq, onyń aitýynsha, balalarǵa psihologiialyq kómek kórsetiledi. Dárigerler jábirlengen balalardyń qaisyna qandai ota jasady degen saýalǵa ministr jaýap bermedi.
"Bul naýqastardyń resmi derekteri ekenin eskere otyryp, qandai operatsiia bolǵanyn aita almaimyn. Aǵzalaryna zaqym kelgendikten, dárigerler tiisti operatsiialardy jasady", - dedi Densaýlyq saqtaý ministrliginiń basshysy.
Onyń aitýynsha, balalar alǵan jaraqattary men jasalǵan operatsiialardyń kúrdelilik dárejesine qarai ońaltý kýrsynan ótedi.
"Emdeý kýrsy, onyń ishinde ońaltý kómegi ár jaǵdaida jeke anyqtalady", - dedi ol.
Aita keteiik, buǵan deiin Almatydaǵy halyqaralyq mektepte 1-synyp oqýshysyna zorlyq-zombylyq jasalǵany habarlandy. Politsiiaǵa ul balanyń anasy aryzdanǵan. Bul derekke qatysty Qylmystyq kodekstiń 121-baby 3-bóligi (Seksýaldyq sipattaǵy zorlyq-zombylyq áreketteri) boiynsha tergeý sharalary bastaldy.
Keiinirek Almaty oblysynyń Baqanas aýylynda 3 jasar egiz qyzdy ógei naǵashy atasy zorlaǵany belgili boldy.
Al keshe kishkentai qyzdardy zorlady degen kúdikke ilingen 40 jastaǵy er adam ustalyp, qamaýǵa alyndy.
