OPEK+ toby munai eksporttaýshy elder munai óndirýdi táýligine 9,7 million barrelge deiin tómendetý jóninde kelisimge kelgenin habarlady. Bul limit mamyr jáne maýsym ailarynda saqtalýy tiis.
Reuters jazýynsha, tórt kúnge sozylǵan kelisssózde munai baǵasynyń quldyraǵanyn toqtatqysy keletin AQSh prezidenti Donald Tramptyń qysymy baiqalǵan.
Munai óndirýdi qysqartý jaily tarihtaǵy eń iri kelisimde (2008 jylǵy daǵdarys kezeńindegiden tórt ese kóp) eksporter elder 2022 jyldyń sáýirine deiin munai óndirý deńgeiin tómendetetini kórsetilgen.
«OPEK+pen úlken kelisim jasaldy. Bul kelisim AQSh-tyń energetika salasyndaǵy júzdegen myń jumys ornyn saqtaýǵa múmkindik beredi», – dep jazdy Tramp Twitter paraqshasynda. Ol Resei prezidenti Vladimir Pýtin men Saýd Arabiiasynyń koroli Salmanǵa ýaǵdalastyqqa qol jetkizýge qosqan úlesteri úshin alǵys aitty.
Reseidiń TASS agenttigi OPEK+ elderi 12 sáýirde shuǵyl ótken otyrysta munai óndirisin qysqartýǵa 23 el túgel keliskenine nazar aýdardy. Alaida aldyn ala josparlaǵandai 10 million barrelge emes, 907 barrelge qysqaratyn bolǵan. Óitkeni Meksika ózine usynylǵan 400 myń barrelge kelispegen.
Osyǵan bailanysty Irannyń munai ministri Bijan Namdar Zangane «Meksika mamyr jáne maýsym ailarynda munai óndirýdi táýligine 100 myń barrelge azaitýy qajet. Qalǵan 300 myń barreldi Meksikanyń ornyna AQSh qysqartýǵa ýáde berdi» dep málimdegen.
OPEK+ tobynyńy kelesi videokonferentsiiasy biyl 10 maýsymda ótýi tiis.
