Ońtústik Qazaqstan oblysy Tólebi aýdanynda eńbekshi jastar arasynda spartakiada ótti. Leńgir qalasynyń ortalyq stadionynda uiymdastyrylǵan saiysqa aimaqtyń iri kásiporyndarynda jumys isteitin 18-29 jasqa deiingi qyz-jigitter qatysyp, sporttyń bes túrinen ózara myqtyny anyqtady, dep habarlaidy QazAqparat tilshisi.
«Eńbekshi jastar - bolashaqqa jol bastar!» atty oblystyq spartakiada QR Prezidentiniń «Bolashaqqa baǵdar: rýhani jańǵyrý» baǵdarlamalyq maqalasy aiasyndaǵy dene shynyqtyrý jáne buqaralyq sportty damytý, jumysshy mamandyqtardy nasihattaý men eńbek jastary arasynda dostyq qarym-qatynasty nyǵaitý maqsatynda uiymdastyryldy.
Shaǵyn fýtbol, voleibol, basketbol, ústel tenisi, sýda júzý boiynsha uiymdastyrylǵan spartakiadaǵa 9 komanda qatysty.
Barlyq komanda músheleri jarysqa jaqsy daiyndyqpen kelip, belsendi túrde qatysty. Ásirese spartakiada uiymdastyrylyp jatqan Tólebi aýdanynyń jastary ózderiniń myqtylyqtaryn dáleldedi.
Jarys qorytyndysy boiynsha jeńimpaz komandalarǵa baǵaly syilyqtar men diplomdar tabys etilse, atalǵan aýdanynyń sportshy jastary stol tennisinen bas júldeni jeńip aldy. Komanda múshelerine 200 myń teńge men arnaiy diplom tabys etildi.
Sonymen qatar, aýdannyń sportshylary basketbol boiynsha da bas júldeni jeńip, 200 myń teńgeni ielendi. Shaǵyn fýtboldan 3-oryn alyp, 75 myń teńgemen marapattaldy.
Al, Leńgir qalasynyń sportshylary basketboldan 3-orynǵa ie bolyp, 75 myń teńge utyp aldy.
