Ońtústik Qazaqstan oblysynyń Saryaǵash aýdanynan 21 otbasy soltústikke kóshti. Qonys aýdarǵandardyń deni bir-birine jaqyn aǵaiyndar, dep habarlaidy Ult.kz tilshisi QazAqparat agenttigine silteme jasap.
Bul joly kóshkenderdiń barlyǵy Saryaǵash aýdanyna qarasty Derbisek aýylynyń turǵyndary. Olar buǵan deiin Soltústiktiń birqatar aýdandaryn aralap, jerimen turǵylyqty halqymen tanysyp qaitqan bolatyn. Tipti sharýashylyq júrgizýge jer tańdap, isteitin kásibin de naqytylap keldi. Barǵan soń kóshken januialar birigip, derbes kooperativ quramyz deidi. Bul maqsatqa 22 myń gektar egistik jer bólinip qoiypty. Turǵyndardyń ózge jerge kóshýine memlekettik qoldaý sebep boldy. Onyń ústine biyl kóktemde soltústiktegi birneshe oblystyń ókilderi osynda eńbek jármeńkesi ótkizdi. 636 kásiporyn tústik óńirdiń azamattaryna 1 myń 785 bos jumys ornyn usyndy. Arnaiy sapar uiymdastyryp, eńbek naryǵyndaǵy jaǵdaiymen tanysyp kelýine jaǵdai jasady.
«Basqarma tarapynan aýdan, qalalardy aralap, jumyspen qamtýdy ortalyqtary, bólimderde jinalystar júrgizildi. Nasihattaý jumystarynyń arqasynda qazir 200-300-ge jaqyn otbasy kóshýge qyzyǵýshylyq bildirip otyr», - deidi Oblystyq áleýmettik baǵdarlamalar jáne jumyspen qamtýdy úilestirý basqarmasynyń basshysy Muhit Otarshiev.
Aita keteiik, buǵan deiin soltústik oblystarǵa ońtústikten 113 otbasy qonys aýdardy. Olar búginde meditsina, aýyl sharýashylyǵy, bilim jáne qurylys salalarynda eńbek etip júr. Endi biri kásipkerlikpen ainalysyp, óz isin dóńgeletýde.
