Ońtústik Qazaqstan oblysyndaǵy 836 aýyldyq eldi meken halqynyń 73 paiyzy aýyz sýmen tolyq qamtylǵan. Sondai-aq, qalalyq eldi mekenniń 93,1 paiyz jurty ortalyqtandyrylǵan sý júielerine qol jetkizgen. Búgin bul týraly oblys ákimdiginde ótken selektorlyq otyrysta oblystyq energetika jáne turǵyn úi - kommýnaldyq sharýashylyq basqarmasynyń basshysy Marǵulan Maraiym málim etti.
Oblys eldi mekenderin sapaly aýyz sýmen qamtamasyz etý maqsatynda «Óńirlerdi damytýdyń 2020 jylǵa deiingi» baǵdarlamasyn aiasynda aýqymdy jumystar atqarylýda. Baǵdarlama boiynsha 2020 jylǵa deiin qala turǵyndarynyń 97 paiyzyn, aýyldyq eldimeken halqynyń 62 paiyzyn ortalyqtandyrylǵan aýyz sý qubyrymen qamtamasyz etý josparlanǵan. Osy baǵytta, 2011-2016 jyldary 73,9 mlrd.teńgege 268 nysannyń qurylysy júrgizilip, 178 eldi mekendegi 469 myń adam jańa ortalyqtandyrylǵan sý júielerimen qamtylǵan.
«Halyqty aýyz sýmen qamtý boiynsha bizdiń oblystyń kórsetkishi respýblikada qalalar boiynsha 92,9 paiyz, eldi mekender boiynsha 55,6 paiyzdy quraidy. Ońtústik Qazaqstan oblysy respýblika boiynsha qalalarda 9 orynǵa, aýyldyq eldi mekenderde 4 orynǵa ornalasyp, baǵdalamadaǵy 2020 jylǵa mejelengen kórsetkish merziminen buryn, artyǵymen oryndalyp otyr», - dedi basqarma basshysy Marǵulan Maraiym.
Al, biylǵy jyly óńirde respýblikalyq jáne oblystyq biýdjet esebinen 4,7 mlrd. teńge kóleminde qarjy bólinip, 25 eldi mekende qurylys jumystary júrgizilýde. Sonyń ishinde 5 eldi meken halqy jańa aýyz sý qubyrlarymen qamtylsa, 3 eldi mekendegi tozyǵy jetken aýyz sý júieleri jańartylatyn bolady. Qalǵan 17 eldi mekendegi qurylys jumystary 2018 jyly aiaqtalady dep kútilýde.
Atqarylǵan jumystarǵa qanyqqan óńir basshysy aýyz sýmen qamtý maqsatyndaǵy jumystardy júielep, bólingen qarjylardyń maqsatty jumsalýyna mán berýdi tapsyrdy.
«Bizdiń maqsatymyz - halyqty taza aýyz sýmen qamtamasyz etý. Respýblika boiynsha eldi mekenderdi aýyz sýmen qamtýda 4-shi orynda turmyz dep toqmeiilsýge bolmaidy. Oblys kóleminde aýyz sýmen qamtylýy jaǵynan eń tómengi kórsetkish Arys qalasy men Saryaǵash, Shardara aýdandarynda oryn alyp otyr. Osy olqylyqtardyń ornyn toltyrý qajet. Aýyz sýmen qamtý maqsatyndaǵy jumystardy tiisti sala basshylaryna júieleýdi tapsyramyn», - dedi J. Túimebaev.
Jiynda sondai-aq tótenshe jaǵdailar jónindegi departamentiniń basshysy N. Derbisovtiń baiandamasy tyńdaldy. Osy rette sý tasqynyna qarsy qorǵanys dambalary men sý qoimalarynyń qurylysyna qatysty birqatar eskerpeler berildi. Sondai-aq oblys aýmaǵyndaǵy respýblikalyq, oblystyq jáne aýdan ishilik mańyzy bar avtomobil joldarynda 2017-2018 jylǵy qys mezgilinde kólik qatynasynyń úzilmeýin qamtamasyz etý máseleleri talqylandy.
Selektorlyq otyrysta «Densaýlyq» memlekettik baǵdarlamasynyń oryndalýy men oblystaǵy aýyl sharýashylyǵy maqsatyndaǵy jerlerdiń topyraq qunarlyǵyn arttyrý, aýyl sharýashylyǵy alqaptarynyń jáne úi irgelik jerleriniń igerilýi barysy da talqylanyp, sala basshylaryna tiistitapsyrmalar berildi.
