Ońtústik Qazaqstan oblysynda sýǵa shomylý jáne jylytý maýsymyndaǵy oqys oqiǵalar sany ótken jyldyń tiisti merzimimen salystyrǵanda azaidy. Bul týraly OQO óńirlik kommýnikatsiialar qyzmetinde ótken baspasóz jinalysynda oblystyq tótenshe jaǵdai departamentiniń ókilderi málimdedi, dep habarlaidy "Ult aqparat" ákimniń baspasóz qyzmetine silteme jasap.
Brifingte sóz alǵan departamenttiń tótenshe jaǵdailardy joiý bóliminiń bastyǵy Nurjan Ásibekovtyń aitýynsha, departament pen jergilikti politsiia qyzmetkerleriniń jumyla jumys atqarýy oń nátije berip otyr.
«Jyl basynan beri sýǵa ketken adamdar sany 71-den 31 adamǵa deiin, iaǵni, 56 paiyzǵa kemidi. Biylǵy 1 qazandaǵy jaǵdai boiynsha oblystyń sý aidyndarynda 31 adamnyń sýda qaza bolý oqiǵasy tirkeldi, onyń ishinde 17-si - balalar men jasóspirimder. Shilde-tamyz aiynda adamdardyń kóp qaza bolýy sý aidyndarynda tirkelip otyr. Bul eńbek demalysy men jazǵy demalys kezeńimen bailanysty»,-dedi N.Ásibekov.
Bólim basshysynyń aitýynsha, oqys oqiǵalardyń negizgi sebepteri jabdyqtalmaǵan sý aidyndarynda sýǵa shomylý, balalardyń eresek adamdardyń qaraýynsyz qalýy, sýdaǵy qaýipsizdiktiń qarapaiym qaǵidalaryn buzý bolyp otyr. Endi kún sýytsa da sý aidyndaryndaǵy qaýipsizdik máselesi áli ózekti, sebebi kúz ben qysta balyq aýlaý kezeńi bastalyp ketti.
Buǵan qosa jylytý maýsymyndaǵy oqys oqiǵalar da azaiyp otyr. Tótenshe jaǵdai departamenti ókilderiniń aitýynsha, OQO-da 2017 jylǵy jylytý maýsymynda ýly gazben ýlanýdyń 24 oqiǵasy tirkeldi.
«2017 jyldyń qańtar-sáýir ailary aralyǵynda isi gazymen ýlanýdyń 24 oqiǵasy tirkeldi. Sonyń saldarynan 46 adam zardap shekti, onyń ishinde 11-i qaitys boldy. Ótken jylmen salystyrǵanda tirkelgen oqiǵa men zardap shekken adamdar sany azaidy. Salystyrý úshin aitsaq, 2016 jyly 29 oqiǵa tirkelip, 76 adam zardap shekti. 28 adam qaitys bolǵan edi»,- deidi órt qaýipsizdigi salasyndaǵy baqylaý jáne aldyn alý qyzmeti basqarmasy bastyǵynyń orynbasary Baýyrjan Izbasarov.
Barlyq oqiǵalardy departament mamandary zerdelep shyǵyp, adamdar ýlanýǵa qatysty 24 oqiǵanyń 21-i – tabiǵi gazben ýlaný, al úsheýi qatty otyn jaǵylatyn peshti qoldanǵanda oryn alǵanyn anyqtady. Kóbisi, iaǵni, 21 fakti jeke úide bolsa, qoǵamdyq monshada 2 oqiǵa tirkelgen. Ýlanýdyń negizgi sebepteri – jaramsyz peshterdi paidalaný men turmystyq gaz qurylǵylaryn paidalaný kezinde órt qaýipsizdik qaǵidalarynyń buzylýy. Sondai-aq ýly gazben ýlanǵandardyń basym kóbisi uiqyda bolǵan. Endi osyndai keleńsizdikterdiń aldyn alý maqsatynda departament mamandary aldyn alý is-sharalaryn bastap ketken. Máselen, 1 qyrkúiekten bastap turǵyn úi sektorlarynda órt qaýipsizdigi ailyǵy ótkizilýde.
