Ońtústiktiń jastaryna soltústik oblystarda tegin oqýǵa múmkindik beretin «Serpin» jobasyna qujat qabyldaý jumystary qyzý júrip jatyr, dep habarlaidy OQO ákiminiń baspasóz qyzmeti.
Biyl joba aiasynda Soltústik, Shyǵys, Batys Qazaqstan, Aqtóbe, Aqmola, Qostanai, Pavlodar, Qaraǵandy, Atyraý oblystaryndaǵy joǵary jáne ornaýly orta oqý oryndaryna 4513 grant bólingen. Onyń 3793-i joǵary oqý oryndaryna, qalǵany kolledjderge bólinip otyr.
Aita ketý kerek, búgingi tańda Ońtústik Qazaqstan oblysynan 5627 jas osy joba aiasynda bilim alyp jatyr. Alǵashqy qatysýshylar diplom alyp, jumysqa ornalasyp úlgergen.
Jobanyń artyqshylyǵy sol, halqy tyǵyz ornalasqan ońtústik jastarynyń tegin bilim alýyna, óz mamandyǵy boiynsha jumysqa ornalasýyna múmkindik beriledi. Jumyssyzdyq, balabaqsha, mektep jetispeýshilik sekildi birqatar áleýmettik máselelerdiń oń sheshim tabýyna yqpal etedi. Eń bastysy, halqy sirep jatqan soltústik óńirler qarakózdermen tolyǵady.
Aita keteiik, sońǵy úsh jylda 9 oblysqa - Soltústik, Shyǵys, Batys Qazaqstan oblystary men Aqtóbe, Aqmola, Qostanai, Pavlodar, Qaraǵandy jáne Atyraý oblystaryna 5627 túlektiń 4698-i joǵary oqý ornyna tússe, 929 talapker kolledjderde bilimin jalǵastyrǵan. Iaǵni, 2014 jyly «Serpin-2050» baǵdarlamasy aiasynda joǵary oqý oryndaryna 1050 grant bólinip, 540 talapker oqýǵa tússe, 2015 jyly 5000 grant bólinip óńirimizden 2580 túlek oqýǵa túsken. Al 2016 jyly 3162 grant bólinip, 1578 talapker grant iegeri atanǵan.
