Búgin Ońtústik Qazaqstan oblysynyń ákimdiginde oblystyq Qoǵamdyq Keńestiń otyrysy ótti, dep habarlaidy "Ult aqparat" aimaq basshysynyń baspasóz qyzmetine silteme jasap.
Otyrysta Jergilikti politsiia qyzmetiniń esebi, memlekettik bilim berý tapsyrysyn ornalastyrý jaiy men oblystyq ekonomika jáne biýdjettik josparlaý basqarmasynyń biýdjettik baǵdarlama jobalary jáne kóshi-qon protsesterin retteý Qaǵidalary syndy 13 másele qaraldy.
Keńes otyrysyna oblys ákiminiń orynbasarlary men apparat basshysy jáne oblystyq qoǵamdyq keńes músheleri, basqarma basshylary men BAQ ókilderi qatysty.
Kún tártibindegi birinshi másele boiynsha OQO IID jergilikti politsiia qyzmetiniń bastyǵy Ábdiǵani Seidýaliev osy jyldyń 8 aiynda Jergilikti politsiia qyzmetiniń atqarǵan jedel-qyzmettik jumystarynyń qorytyndysyn baiandady.
Onyń aitýynsha, osy jyldyń segiz aiynda júzege asyrylǵan sharalardyń nátijesinde oblys aýmaǵynda oryn alǵan jalpy qylmystar 15,3 paiyzǵa tómendegen. Al qoǵamdyq oryndarda jasalǵan qylmystar 21,4 paiyzǵa, kóshede jasalǵan qylmystar 29,6 paiyzǵa azaiǵan.
Sonymen qatar, jiynda sóz alǵan oblystyq bilim basqarmasynyń basshysy I.Saǵyndyqov Elbasynyń búgingi tańda qoiyp otyrǵan mindetteriniń biri qazaqstandyq jastarǵa kásiptik bilimdi tegin berý ekenin atap ótti.
««Barshaǵa tegin kásiptik-tehnikalyq bilim» jobasy aiasynda oblysymyzǵa 2017-2018 oqý jylyna respýblikalyq biýdjetten 4584 oryn bólindi. Sonyń ishinde: kópbalaly otbasynan 2264 bala, 68 jetim bala, az qamtylǵan otbasynan 2470 bala qamtyldy. Jańa oqý jylyna tehnikalyq jáne kásiptik bilim salasynda kadrlardy daiarlaý boiynsha oblystyq biýdjetten 91 mamandyq boiynsha 11084 oryn, respýblikalyq biýdjetten 26 mamandyq boiynsha 4584 oryn, barlyǵy 15668 oryn memlekettik tapsyrys berildi»,-dedi basqarma basshysy.
Keńes otyrysynyń qorytyndysymen kún tártibinde qaralǵan máseleler koǵamdyq keńes músheleri tarapynan biraýyzdan maquldanyp, oblystyq máslihattyń qaraýyna usynyldy.
