Ońtústikqazaqstandyq óner ujymdarynyń eńbegi elendi. Taiaýda ǵana álem jurtshylyǵynyń nazaryn ózine aýdarǵan EKSPO-2017 halyqaralyq kórmesiniń joǵary deńgeide atalyp ótýine atsalysqan óńirdiń shyǵarmashylyq ujymdarynyń eńbegi ministrlik tarapynan erekshe elenip otyr. Bul týraly QR Mádeniet jáne sport ministri Arystanbek Muhamediulynyń Ońtústik Qazaqstan oblysy ákimi Janseiit Túimebaevqa arnaiy jibergen hatynda málim etilgen, dep habarlaidy "Ult aqparat".
Atalǵan hatta ministr EKSPO-2017 halyqaralyq kórmesi aiasynda mádeni jáne sporttyq is-sharalardy, sonyń ishinde Ońtústik Qazaqstan oblysynyń mádeniet kúnderi men Gýstav Malerdiń №8 simfoniiasy premerasyn ótkizýge atsalysqan Ońtústik Qazaqstan oblysynyń shyǵarmashylyq ujymdaryna alǵysyn bildirgen.
«Atalǵan sharalarda Ońtústik Qazaqstan oblysynyń shyǵarmashylyq jáne sport ujymdarynyń biik dárejede kórsetken óneri kórermenderdiń ystyq yqylasy men qoshemetine ie bolyp, EKSPO -2017 kórmesiniń joǵary deńgeide ótýine septigin tigizdi. Bul rette Sizge jáne Siz arqyly Ońtústik Qazaqstan oblysynyń mádeniet jáne sport qyzmetkerlerine shyǵarmashylyq shabyt pen tolaǵai tabys tileimin», - deidi joldanǵan hatta Arystan Muhamediuly.
Eske sala keteiik, EKSPO-2017 halyqaralyq mamandandyrylǵan kórmesi aiasynda Astana qalasynda 29 tamyz ben 3 qyrkúiek kúnderi aralyǵynda Ońtústik Qazaqstan oblysynyń kúnderi joǵary deńgeide atalyp ótken bolatyn. Osy aralyqta ońtústikqazaqstandyq óner ujymdary 40-tan astam mádeni is-sharalar uiymdastyryp, Astana qonaqtary men turǵyndarynyń ystyq yqylasyna ie bolǵan edi.
Atap aitsaq, bir ǵana elordadaǵy Ońtústik Qazaqstan oblysynyń mádeniet kúnderi aiasynda ótken jalpy jurtshylyqqa arnalǵan «EKSPO-ǵa Ońtústikten án shashý!» atty oblystyń óner sheberleriniń gala-kontsertine 75 myń adam kirip, rekord ornatqan edi. Al, jalpy EKSPO -2017 kórmesine Ońtústik Qazaqstan oblysynan 151 myń adam baryp qatysty.
