Búgin ońtústikqazaqstandyq 500 oqýshy Elorda tórinde ótip jatqan EKSPO-2017 halyqaralyq kórmesin tamashalaýǵa Shymkent qalasynan Astanaǵa jolǵa shyqty.
Balalardy Shymkent qalasyndaǵy ákimshilik iskerlik ortalyǵy alańynan óńir basshysynyń orynbasary Baýyrjan Jamalov pen ata-analary, ustazdary men dostary aq jol tilep shyǵaryp saldy. Demeýshilerdiń qoldaýymen qolǵa alynǵan igi is aiasynda balalar kórmeni aralap, bas qalanyń kórikti jerlerin tamashalamaq.
«EKSPO-2017 kórmesi sizderge erekshe áser qaldyratynyna senim mol. Barsha qazaqstandyqtardyń maqtanyshyna ainalǵan kórmeni jaqsylap tamashalap, jańa oqý jylyna kóterińki kóńil kúimen kelýlerińizge tilektespin. Osy saparlaryńyzǵa demeýshilik tanytyp, jańashyrlyq bildirgen barsha azamattarǵa alǵysymyz sheksiz»,- dedi Baýyrjan Sardaruly.
Astanaǵa jolǵa shyqqan top quramynda jetim balalar men kóp balaly otbasylardan shyqqan jáne áleýmettik toptaǵy balalar bar. Balalarǵa oblystyq bilim basqarmasymen birge 42 jetekshi 10 dəriger maman bekitilgen. Al, Astanaǵa jetken soń, oqýshylar «EKSPO» qalashyǵyndaǵy jataqhanaǵa jaiǵasady. As máziri de atalǵan jataqhana ashanasynda úlestiriletin bolady.
Saiahattyń alǵashqy kúninde belsendi top kórmeniń basty nysany - «Nurly álem» ulttyq pavilony, sondai-aq, sheteldikterdiń usynǵan zamanaýi tehnologiiasynyń jańa jetistikterin tamashalap, energiia-qýat kúshin alatyn tyń joba - jeke aimaǵymen tanyspaq niette.
Aita keteiik, elimizdiń bas qalasy – Astanada ótip jatqan EKSPO-2017 halyqaralyq kórmeni Ońtústik Qazaqstan oblysynan kún saiyn túrli toptaǵy azamattar attanyp, elordadaǵy álemdik mańyzdy sharanyń kýási bolyp jatyr. Búgingi kúnge deiin 30 myńnan astam ońtústikqazaqstandyq kórmeni tamashalap úlgergen. Onyń ishinde 2 myńǵa jýyǵy mektep shákirtteri. Al, Astanaǵa baryp qaitqan oqýshylar halyqaralyq mańyzdy sharanyń kýási bolǵanyna erekshe qýanyp, airyqsha áser alyp qaitýda. Bul óz eliniń bolashaq patriottary úshin úlken qoldaý, kómek bolýda.
Buǵan deiin EXPO-2017 halyqaralyq kórmesin tamashalaý úshin óńirdegi áleýmettik az qamtylǵan otbasy balalary men oqýda ozat, qoǵamdyq jumystarǵa belsene qatysqan jáne bilimi men ónegeli tárbiesi úshin oqýshylarǵa memleket jáne demeýshiler esebinen 3750 oqýshyǵa joldama berilgen bolatyn.
Búgingi kúnge deiin joldama alǵan balalardyń 2250-i aitýly kórmeni tamashalap qaitqan bolsa, qalǵan 1500 oqýshy aǵymdaǵy jyldyń qyrkúiek aiyna deiin Elordamyzǵa baryp, mádeni sharany kózben kórmek.
