Qarashanyń toǵyzy qazaq ádebieti úshin ǵana emes, qazaq jurty úshin de qaraly habarymen este qalǵandai boldy. Qazaq eliniń birtýar perzenti, QR eńbek sińirgen qairatkeri, «Parasat» ordeniniń iegeri, Halyqaralyq «Alash» ádebi syilyǵynyń laýreaty, jýrnalist, satirik Kópen Ámirbek ómirden ozdy.
Qalamgerdiń týǵan jerinde, Otyrar aýdanynda taý tulǵamen qoshtasý jiyny ótti. Jiyndy aýdan ákimi Sáken Sultanhanov júrgizdi. Qazaqstan Respýblikasynyń prezidenti Qasym-Jomart Kemeluly Toqaev bastap, Senat, Májilis depýtattary, ministrler, qoǵam qairatkerleri, oblys ákimderi, qalyń oqyrmandary men kópshilik qaýym Kópen Ámirbektiń otbasy men jaqyndaryna kóńil aityp, qalyń qazaqtyń qaiǵysyn bólisip jatty.
Aýdandyq mádeniet saraiynda ótken qoshtasý jiynyna qatysqan halyqtyń da qarasy mol boldy. Qazaqstan Respýblikasynyń Prezidenti Qasym-Jomart Toqaevtyń, Parlament senatynyń tóraǵasy Máýlen Áshimbaevtyń jáne QR Májilisiniń tóraǵasy, «Amanat» partiiasynyń basshysy Erlan Qoshanovtyń, Mádeniet jáne sport ministri Dáýren Abaevtyń kóńil aitý hattaryn QR mádeniet jáne sport vitse-ministri Nurqisa Dáýeshov kópke oqyp berip, aǵaiyn-týystaryna tapsyrdy.
Túrkistan oblysynyń ákimi Darhan Satybaldynyń kóńil aitý hatyn oblys ákiminiń orynbasary Sáken Qalqamanov, Shymkent qalasynyń ákimi Murat Áitenovtiń kóńil aitý hatyn qala ákiminiń birinshi orynbasary Shyńǵys Muqan oqyp, qazaly jurtqa kóńil aitty. QR jazýshylar Odaǵynyń hatshysy Mereke Qulkenov, memleket jáne qoǵam qairatkeri Shalatai Myrzahmetov jáne Kópen Ámirbektiń dosy Isahan Aqylbekov syndy tulǵalar qalamgerdiń ómir joly, ádebiet álemine sińirgen eńbegi, azamattyq tulǵasy týraly estelikter aityp, syr shertti. Baýyryndai bolyp ósken ǵalym, synshy Qulbek Ergóbektiń qimastyq sózi kóptiń kóńilin bosatty. Qoshtasý jiynynan soń, qaraly jurt «Arystan baba» meshitindegi janaza namazyna qatysyp, quran baǵyshtady.
Qazaqtai el barda, qazaq ádebieti barda Kópen Ámirbektiń esimi eshqashan óshpeidi. Qalamgerdiń artynda qalǵan rýhani murasynan áli talai oqyrman sýsyndai bereri anyq.
