QR Premer-Ministri Álihan Smaiylov aldaǵy vegetatsiialyq kezeńde Qazaqstannyń ońtústik óńirleriniń aýyl sharýashylyǵy taýaryn óndirýshilerin sýarmaly sýmen qamtamasyz etý máseleleri jóninde keńes ótkizdi, dep habarlaidy "Ult aqparat" primeminister.kz-ke silteme jasap.
Ekologiia, geologiia jáne tabiǵi resýrstar, aýyl sharýashylyǵy, energetika ministrleri, sondai-aq Qyzylorda, Túrkistan jáne Jambyl oblystarynyń basshylyǵy Aral-Syrdariia basseininde qalyptasqan jaǵdai týraly baiandady.
Biyl sýdyń az kelýine bailanysty Qyrǵyz Respýblikasynyń aýmaǵyndaǵy Toqtoǵul sý qoimasyna jinalǵan sýdyń kólemi ótken jylǵy deńgeige jetpeidi. Qyrǵyzstannyń óziniń sý-energetikalyq qajettilikterin qamtamasyz etýi tiis ekenin eskere otyryp, Qazaqstan aýmaǵyna jiberiletin sý kóleminiń tómendeý qaýpi bar.
Premer-Ministr Ekologiia, geologiia jáne tabiǵi resýrstar, sondai-aq Energetika ministrlikterine kóktemgi-jazǵy kezeńde elimizdiń ońtústik óńirleriniń sýarmaly jerlerin sýmen qamtamasyz etý úshin túbegeili sharalar qabyldaýdy tapsyrdy.
Á. Smaiylov transshekaralyq ózenderdiń resýrstaryn paidalaný boiynsha ózara tiimdi sheshimder qabyldaý úshin Qyrǵyzstanmen jáne Ózbekstanmen qarqyndy kelissózder júrgizý qajet ekenin atap ótti.
Aýyl sharýashylyǵy ministrligine sý únemdeý tehnologiialaryn jáne agrarlyq salada sý resýrstaryn tiimdi paidalanýdyń basqa da quraldaryn engizý aiasyndaǵy jumysty kúsheitý tapsyryldy.
