Sońǵy táýlikte Ońtústik Koreiada 60 adam koronavirýs juqtyrǵan, dep habarlaidy Yonhap.
Osylaisha, atalmysh dertke shaldyqqandar sany 893-ke jetti. Búgingi kúnge deiin 8 adam koronavirýstan kóz jumǵan.
Úkimet eldegi eki aimaq virýstyń oshaǵyna ainalǵanyn málim etti, olar – ońtústik-shyǵystaǵy Tegý qalasyndaǵy dini sekta, al ekinshisi – kórshiles ornalasqan Chhondo shtatyndaǵy aýrýhana. Onda infektsiia juqtyrǵandar sany óte jyldam ósip jatyr. Aita keteiik, Ońtústik Koreiada koronavirýsqa shaldyqqandardyń jartysynan astamy atalmysh aimaqtarda turady.
Sońǵy bir kúnde aýrý juqtyrǵan 60 adamnyń 49-y - Seýlden 300 shaqyrym qashyqtyqta ornalasqan Tegý qalasy men kórshiles Soltústik Kionsan provintsiiasynyń turǵyndary.
Iri provintsiialar men qalalardyń bárinde derlik virýs juqtyrýdyń jańa jaǵdailary tirkelgen. Koreialyq aýrýlardyń aldyn alý jáne baqylaý ortalyǵynyń (KCDC) málimetinshe, Seýlde eki adam qaterli dertke shaldyqsa, Pýsanda – 3 adam, Kiongi provintsiiasynda – 5 adam aýrý juqtyrdy.
Eske sala keteiik, keshe ǵana Ońtústik Koreia úkimeti koronavirýs juqtyrǵandar sany rekordtyq deńgeige jetkenin jariialaǵan edi. Al jeksenbide eldegi virýsty eskertý deńgeii eń joǵarǵy – «qyzylǵa» deiin kóterildi.
