Ońtústik halqy 2050 jylǵa qarai 5,2 mln adamǵa ósip, jalpy el halqynyń 55 paiyzyn quraityn bolady. Bul týraly búgin Májilistegi úkimet saǵatynda QR Densaýlyq saqtaý jáne áleýmettik damý ministri Tamara Dúisenova aitty, dep habarlaidy Baq.kz tilshisi.
«Eńbek resýrsynyń tapshylyǵy bar óńirlerge azamattardy erikti túrde kóshirý júzege asyrylyp jatyr. Bizdiń institýttar men ulttyq sarapshylar qazirgi demografiialyq jáne kóshi-qon úrdisin eskere otyryp, ońtústik óńirlerdiń halqy 5,2 mln adamǵa ósedi boljap otyr. Sóitip, el halqynyń 55 paiyzyn quraityn bolady», - deidi T.Dúisenova.
Bul oraida ońtústik halqynyń ornalasý tyǵyzdyǵy soltústik óńirlerden 4 eseden asyp túspek.
«Bul eńbek resýrstary boiynsha qiyndyqtar týdyrady. Osy úrdis eskerile otyryp, erikti qonys aýdarý geografiiasy keńeitildi. Eger alǵashqy jyldary halyq tek bir oblystyń ishinde ekonomikalyq áleýeti tómen eldi mekenderden aýdandyq qalalarǵa kóshirilse, 2015 jyldan bastap oblysaralyq qonys aýdarý bastaldy. Qazirgi ýaqytta úkimet halyqty ońtústikten soltústikke kóshirý úshin kvotalar belgiledi», - dep atap ótti ministr.
«Halyqty jumyspen qamtýdyń jol kartasy -2020» baǵdarlamasy júzege asyrylǵan jyldary 5 myń otbasy nemese 18 myń adam erikti túrde qonys aýdarǵan. Onyń 78 paiyzy turaqty jumysqa ornalasty. Osy maqsatqa biýdjetten 37 mlrd teńge bólindi, qarajattyń 98 paiyzy baspana, injenerlik-kommýnikatsiialyq infraqurylymdy salýǵa jumsalypty.
