Ońtústik Qazaqstan oblysyna jyl basynan beri 128 myń týrist kelgen. Bul ótken jylmen salystyrǵanda 55 paiyzǵa kóp. Bul týraly OQO óńirlik kommýnikatsiialar qyzmetinde ótken baspasóz konferentsiiasynda oblystyq kásipkerlik, indýstrialdy-innovatsiialyq damý jáne týrizm basqarmasynyń basshysy Batyrhan Qurmanseiit málim etti, dep habarlaidy "Ult aqparat" aimaq basshysynyń baspasóz qyzmetine silteme jasap.
Onyń aitýynsha, oblysta biyl týrizm salasynyń qarqyndy damýy baiqalady. Ótken jylmen salystyrǵanda týristik nysandar sany 31 paiyzǵa ósip, 195-ti quraǵan. Al olarda 1,7 mlrd.teńgeniń kóleminde qyzmetter kórsetilip, qyzmetter kólemi 43 paiyzǵa jetken.
«Endi ishki týrizmdi damytýǵa barynsha kóńil aýdaryp jatyrmyz. Ońtústikke kelýshi týristerge qolaily jaǵdai jasaý maqsatynda oblysta 1, 2 jáne 3 kúndik týristik marshrýttar ázirlengen. Atalǵan marshrýtqa 84 tarihi-mádeni obektiler men tabiǵi oryndar engizildi. Jalpy óńirimizde 800-den astam tarihi jáne mádeni eskertkishter ornalasqan. Osy rette, oblys týrizmin damytý maqsatynda birqatar mańyzdy jobalar júzege asyrylýda»,- dedi B.Qurmanseiit.
Basqarma basshysynyń málimdeýinshe, Shymkenttiń eski qalashyǵy aýmaǵynda ashyq aspan astyndaǵy murajai ashý, Ábý Nasyr Ál-Farabi dúniege kelgen Oqsyz qonysyn jáne Abylai hannyń Ordasy ornalasqan Hanqorǵandy qalpyna keltirý, Qazyǵurt jáne Ordabasy aýdandarynda álemdik standartqa sáikes servisi men týristik infraqurylymy bar brendke ainaldyrý, Qoja Ahmet Iassaýi kesenesine keletin otandyq jáne sheteldik týristerdiń aǵymyn eskere otyryp, onyń tarihyn jáne aimaǵyn álemdik murajailar úlgisinde aýdio-video vizýalizatsiialaý, orta ǵasyrda Otyrar kóne qalashyǵy men Arystanbap kesenesin bailanystyrǵan joldy qalpyna keltire otyryp, sol jol boiynda ulttyq qolóner sheberhanalaryn ornalastyrý josparlanýda.
