Ońtústik Qazaqstan oblysynda aldaǵy ýaqytta basqarý shemasyn júielendirý maqsatynda tórt basqarma qaita qurylatyn bolady. Bul týraly búgingi ótken altynshy shaqyrylymdaǵy Ońtústik Qazaqstan oblystyq máslihatynyń kezekten tys on besinshi sessiiasynda málim boldy, dep habarlaidy "Ult aqparat" óńir basshysynyń baspasóz qyzmetine silteme jasap.
Iaǵni, óńirdegi týrizmdi tiianaqty damytý jáne oblysqa tartylatyn syrtqy investitsiianyń kólemin arttyrý maqsatynda «Týrizm jáne syrtqy bailanystar», Elbasynyń áleýmettik-ekonomikalyq damýdy tsifrlandyrýǵa kóshirý bastamasyn oryndaý jáne halyqqa kórsetiletin memlekettik qyzmettiń sapasyn arttyrý úshin «Aqparattandyrý, memlekettik qyzmet kórsetý jáne arhivter», otbasy qundylyqtaryn dáripteý, zorlyq-zombylyqtyń aldyn alý maqsatynda «Otbasy, balalar men jastar isteri jónindegi» jáne mádeniet pen ana tildi, sondai-aq, oblysta turatyn etnos ókilderiniń tilderin júieli túrde damytý úshin «Mádeniet jáne tilderdi damytý» basqarmalary qaita qurylady.
Sessiia jumysyna qatysqan oblys ákimi J.Túimebaev qurylatyn basqarmalar basqarý júiesin ońtailandyryp, óńirdiń áleýmettik-ekonomikalyq damýyna óz septigin tigizetinin atap ótti.
«Oblystyń basty tabys kózi ol egin sharýashylyǵy, mal sharýashylyǵy, óndiris, qurylys, sondai-aq týrizm salalary. Iaǵni, osy týrizm salasyn ary qarai damytýymyz kerek. Sondyqtan da týrizm jáne syrtqy bailanystar basqarmasyn kásipkerlik basqarmasynan shyǵaryp otyrmyz. Jalpy dúniede kóptegen memleketterde týrizm sol eldiń ekonomikasyna jaqsy kiris keltirýde. Tek qana Túrkiia Respýblikasynyń ózinde jylyna týrizmnen 40 mlrd. AQSh dollar bolatyn kiris kirgen. Al endi Ońtústik týrister úshin tarihi eskertkishter men kieli jerlerdiń otany desek, osy salada birlese jumys atqaryp, týrizmdi damytýdy myqtap qolǵa alýymyz kerek»,-dedi ákim.
Aita keteiik, sessiia jumysyna oblys ákimdiktiń músheleri men aýmaqtyq sailaý komissiiasynyń tóraǵasy, qala jáne aýdan ákimderi, quqyq qorǵaý organdarynyń, oblystyq aýmaqtyq departamentter men basqarmalardyń basshylary, buqaralyq aqparat quraldarynyń ókilderi qatysty.
Máslihat sessiiasynyń kún tártibinde budan bólek, 2017-2019 jyldarǵa arnalǵan oblystyq biýdjetke ózgerister men tolyqtyrý engizý, Shardara qalasynyń jáne Qaýysbek Turysbekov aýyldyq okrýginiń shekaralaryn ózgertý,oblysta ornalasqan memlekettik zańdy tulǵalarǵa ataý berý jáne qaita ataý týraly usynystardy Respýblikalyq onomastika komissiiasynyń qaraýyna engizý, aýyldyq jerge jumysqa jiberilgen meditsina jáne farmatsevtika qyzmetkerlerin áleýmettik qoldaý sharalarynyń júiesi syndy 13 másele qaraldy.
