Ońtústik Qazaqstan oblysynyń Saryaǵash aýdanynda QR Tuńǵysh Prezidenti kúni merekesine orai Áiteke bidiń eskertkishi ashyldy, dep habarlaidy "Ult aqparat".
Jiynǵa qatysýshylar Áiteke bidiń qairatkerligi men danalyǵyn sóz etip, ult maqtanyshyna ainalǵan iri tulǵanyń búgingi urpaqqa berer ónegesi men taǵylymyn baiandady.
«Áz Táýkeni taqqa otyrǵyzyp, qazaq handyǵynda beibit kún ornatýǵa at salysqan Áiteke bi - tarihtaǵy aitýly tulǵa. Qazaq tarihynda altyn árippen tańbalanǵan zańǵar tulǵanyń eli úshin etken eńbegi áli kúnge el aýzynda. Ámir Temir ósietteri men qolbasshylyq ónerin jetik meńgergen ol, 36 jasynda Túrkistanda áz Táýkeniń han bolyp sailanýyna úlken yqpal etedi. El namysyn kózdiń qarashyǵyndai qorǵaǵan tulǵany taný arqyly jas býyn boiyna qairatkerlik, otansúigishtik qasietterdi sińiredi. Kúre joldyń boiynda eńse tiktegen dańqty bidiń eskertkishi el birliginiń simvoly bola bermek», - dedi belgili ǵalym Erkin Qanjigitov.
Eskertkishtiń ashylý saltanatynan keiin ótken «Yrys aldy - yntymaq» forýmynda aýdan ákimi Qairat Ábdýaliev sóz sóilep, Tóle, Qazybek, Áiteke bilerdiń buqara halyqty yntymaq pen birlikke úndegen eren eńbekterin atap ótti.
Sharaǵa qatysqan Qazaqstan Respýblikasyna eńbegi sińgen zańger, zań ǵylymdarynyń doktory, professor Beket Turǵaraev «Ulylardy ulyqtaý - urpaqtyń paryzy» taqyrybynda baiandama jasasa, ǵalym Erkin Qanjigitov urpaq sabaqtastyǵynyń mańyzyna toqtaldy. Sondai-aq forýmda sóz sóilegen memleket jáne qoǵam qairatkeri Shalatai Myrzahmetov pen oblystyq Ardagerler keńesiniń tóraǵasy Jeńisbek Máýlenqulov, aqyn Hanbibi Esenqaraqyzy el biriligi, ult yntymaqtyǵy týraly keleli oilaryn ortaǵa saldy.
Forým sońynda Áiteke bidiń rýhyna arnalǵan arnaiy as berildi.
