Qytai men Ońtústik Afrika politsiiasy koronavirýsqa qarsy myńdaǵan jalǵan vaktsina tárkiledi, al Interpol bul «aisbergtiń tek basy» ǵana bolýy múmkin dep eskertedi, dep habarlaidy interpol.int.
Interpoldyń 3 naýryzdaǵy esebinde Ońtústik Afrika politsiiasy jalǵan vaktsinalar jasaityn jelini joiǵany aitylǵan.
Ońtústik Afrika politsiiasy jaqynda sol eldiń Gaýteng provintsiiasyndaǵy qoimadan koronavirýsqa qarsy 2400 doza jalǵan vaktsina men jalǵan 3M maskalardyń tárkilengenin jáne sol jerde 3 qytai azamaty men 1 zambiialyqtyń tutqyndalǵanyn habarlady.
Sonymen qatar, Qytai politsiiasy osy jyldyń aqpan aiynda zaýytta jalǵan vaktsinalar jasady degen kúdikpen 80 adamdy ustady jáne kem degende 3000 doza vaktsina tárkiledi.
Qytaidyń Qoǵamdyq qaýipsizdik ministrliginiń ókili quqyq qorǵaý organdarynyń tiisti sharalary vaktsinamen bailanysty qylmystarmen kúresýge baǵyttalǵanyn jáne osyǵan uqsas qylmystardyń aldyn alý úshin Interpolmen jáne basqa elderdegi politsiiamen yntymaqtastyq ornatylǵanyn málimdedi.
Interpoldyń bas hatshysy Iýrgen Stok bul vaktsinamen bailanysty qylmystardyń basy, shaǵyn bir bóligi ǵana dep sanaidy. Ótken jyldyń jeltoqsan aiynda uiym 194 múshe memleketke jalǵan vaktsinalardan saq bolý týraly eskertý jasap, jalǵan meditsinalyq zattardy qalai ajyratý kerek degen baǵytta keńes bergen.
Interpol habarlamasynda internette satylatyn vaktsinalar zańdy ónim bolmaýy jáne synaqtan ótpeýi múmkin ekeni basa aitylady. Jalǵan vaktsinalardy qoldaný ómirge qaýip tóndirýi múmkin.
