Foto: pexels
Qarjy monitoring agenttigi zańsyz onlain-kazino men qumar oiyndardy jarnamalaityn qazaqstandyq blogerlerge qatysty jazany kúsheitýdi usyndy, dep habarlaidy Ult.kz.
Agenttiktiń málimetinshe, qazirgi aiyppul mólsheri blogerlerdi zańsyz áreketterden tyimai otyr. Sondyqtan endi mundai jarnama úshin tabystyń 200–400%-yna deiin aiyppul salý, al iri tabys nemese aýyr saldar bolǵan jaǵdaida — qylmystyq jaýapkershilikke tartý kózdelip otyr.
«Jyl basynan beri 37 bloger onlain-qumar oiyndardy jarnamalaǵan. Olardyń keibiri zań talaptaryn júieli túrde buzǵan. 18 blogerge qatysty materialdar ýákiletti organdarǵa jiberilip, 4,4 mln teńge aiyppul salyndy. Úsh bloger boiynsha sotqa deiingi tergeý júrip jatyr», — dedi vedomstvo ókilderi.
Qoldanystaǵy zań boiynsha tyiym salynǵan qyzmetti jarnamalaý ákimshilik quqyqbuzýshylyq bolyp sanalady. Qazir aiyppul mólsheri 60 AEK-ten 400 AEK-ke deiin, iaǵni shamamen 235 myńnan 1,5 mln teńgege deiin.
Alaida agenttik bul somany zańsyz jarnamadan túsetin paidamen salystyrǵanda tym tómen dep esepteidi jáne quqyqbuzýshylyqtyń aldyn alýǵa jetkiliksiz ekenin atap ótti.
Usynylǵan túzetýler:
Ákimshilik kodekske jańa bap engizý – zańsyz jarnama tabysynan 200–400%-ǵa deiin aiyppul salý jáne tabysty tárkileý;
Eger jarnama 1000 AEK-ten (shamamen 3,9 mln teńge) joǵary tabys ákelse nemese azamattarǵa, uiymdarǵa, memleketke ziian keltirse — qylmystyq jaýapkershilik engizý;
Tabysy 5000 AEK-ten (19,6 mln teńge) asqan jaǵdaida nemese aýyr saldar (ólim, sýitsid) bolsa — qatań jaza taǵaiyndaý.
Sonymen qatar, túzetýlerde qylmystyq top quramynda, qyzmettik ókilettigin paidalanyp nemese qaitalanǵan jaǵdaida jaýapkershilikti aýyrlatatyn belgiler retinde qarastyrý usynylǵan. Agenttik bul bastamany Ádilet ministrligine joldap, Bas prokýratýra, Ádilet jáne Ishki ister ministrlikterimen birlese talqylap jatyr. Prezident Ákimshiligi usynysty jalpy qoldady. Qujatty jyl sońyna deiin pysyqtap aiaqtaý josparlanyp otyr.
