Qazaqstandaǵy onkologiialyq naýqastar Bas prokýror Berik Asylovqa úndeý joldap, Densaýlyq saqtaý ministrliginiń №103 buiryǵyna narazylyq bildirdi. Patsientterdiń aitýynsha, atalǵan qujattyń saldarynan tomoterapiiany tegin meditsinalyq kómektiń kepildik berilgen kólemi aiasynda alý múmkindigi toqtatylǵan, dep habarlaidy ult.kz.
Ótinish avtorlarynyń sózinshe, ózgeris tipti em qabyldap júrgen naýqastarǵa da áser etken. Olar emdi jalǵastyrý úshin qyzmet aqysyn óz qaltasynan tóleýge májbúr bolǵan.
Patsientterdiń málimetinshe, sońǵy alty jyl boiy tomoterapiia memleket kepildik bergen tegin meditsinalyq kómektiń quramynda bolǵan. Al jańa buiryq kúshine engennen keiin bul em túri kóptegen naýqas úshin qoljetimsiz bolyp qalǵan.
Tomoterapiia qaterli isiktiń birqatar túrin emdeýde qoldanylady. Sondai-aq súiek kemigin transplantatsiialaý aldyndaǵy daiyndyq kezeńinde keibir patsientter úshin bul ádis klinikalyq turǵydan mańyzdy ári balamasy joq em retinde qarastyrylady.
Naýqastar Bas prokýrordan Densaýlyq saqtaý ministrliginiń №103 buiryǵyna narazylyq keltirýdi surap otyr. Olardyń pikirinshe, qujat azamattardyń densaýlyq saqtaý quqyǵyn shektep, onkologiialyq naýqastardyń jaǵdaiyn aýyrlatyp, ómirlik mańyzdy emge qoljetimdiligin tómendetedi.
Úndeý avtorlarynyń aitýynsha, jańa talaptardyń saldary qazirdiń ózinde baiqalyp otyr. Biri em aqysyn tóleý úshin múlkin satsa, endi biri nesie rásimdeýge nemese qarajat jinaýǵa májbúr. Keibir naýqastar qajetti emdi shetelden, ásirese Túrkiiadan izdeýge kóshken.
Aita keteiik, patsientter synǵa alǵan sheshim qabyldanǵan kezeńde Densaýlyq saqtaý ministrliginde vitse-ministr qyzmetin atqarǵan Erjan Amangeldiev qazir bul laýazymda jumys istemeidi. Alaida azamattardyń pikirinshe, sol kezde qabyldanǵan sheshimderdiń saldary áli kúnge deiin onkologiialyq naýqastarǵa keri áserin tigizip otyr.
