قازاقستانداعى ونكولوگييالىق ناۋقاستار باس پروكۋرور بەرٸك اسىلوۆقا ٷندەۋ جولداپ, دەنساۋلىق ساقتاۋ مينيسترلٸگٸنٸڭ №103 بۇيرىعىنا نارازىلىق بٸلدٸردٸ. پاتسيەنتتەردٸڭ ايتۋىنشا, اتالعان قۇجاتتىڭ سالدارىنان توموتەراپييانى تەگٸن مەديتسينالىق كٶمەكتٸڭ كەپٸلدٸك بەرٸلگەن كٶلەمٸ اياسىندا الۋ مٷمكٸندٸگٸ توقتاتىلعان, دەپ حابارلايدى ult.kz.
ٶتٸنٸش اۆتورلارىنىڭ سٶزٸنشە, ٶزگەرٸس تٸپتٸ ەم قابىلداپ جٷرگەن ناۋقاستارعا دا ەسەر ەتكەن. ولار ەمدٸ جالعاستىرۋ ٷشٸن قىزمەت اقىسىن ٶز قالتاسىنان تٶلەۋگە مەجبٷر بولعان.
پاتسيەنتتەردٸڭ مەلٸمەتٸنشە, سوڭعى التى جىل بويى توموتەراپييا مەملەكەت كەپٸلدٸك بەرگەن تەگٸن مەديتسينالىق كٶمەكتٸڭ قۇرامىندا بولعان. ال جاڭا بۇيرىق كٷشٸنە ەنگەننەن كەيٸن بۇل ەم تٷرٸ كٶپتەگەن ناۋقاس ٷشٸن قولجەتٸمسٸز بولىپ قالعان.
توموتەراپييا قاتەرلٸ ٸسٸكتٸڭ بٸرقاتار تٷرٸن ەمدەۋدە قولدانىلادى. سونداي-اق سٷيەك كەمٸگٸن ترانسپلانتاتسييالاۋ الدىنداعى دايىندىق كەزەڭٸندە كەيبٸر پاتسيەنتتەر ٷشٸن بۇل ەدٸس كلينيكالىق تۇرعىدان ماڭىزدى ەرٸ بالاماسى جوق ەم رەتٸندە قاراستىرىلادى.
ناۋقاستار باس پروكۋروردان دەنساۋلىق ساقتاۋ مينيسترلٸگٸنٸڭ №103 بۇيرىعىنا نارازىلىق كەلتٸرۋدٸ سۇراپ وتىر. ولاردىڭ پٸكٸرٸنشە, قۇجات ازاماتتاردىڭ دەنساۋلىق ساقتاۋ قۇقىعىن شەكتەپ, ونكولوگييالىق ناۋقاستاردىڭ جاعدايىن اۋىرلاتىپ, ٶمٸرلٸك ماڭىزدى ەمگە قولجەتٸمدٸلٸگٸن تٶمەندەتەدٸ.
ٷندەۋ اۆتورلارىنىڭ ايتۋىنشا, جاڭا تالاپتاردىڭ سالدارى قازٸردٸڭ ٶزٸندە بايقالىپ وتىر. بٸرٸ ەم اقىسىن تٶلەۋ ٷشٸن مٷلكٸن ساتسا, ەندٸ بٸرٸ نەسيە رەسٸمدەۋگە نەمەسە قاراجات جيناۋعا مەجبٷر. كەيبٸر ناۋقاستار قاجەتتٸ ەمدٸ شەتەلدەن, ەسٸرەسە تٷركييادان ٸزدەۋگە كٶشكەن.
ايتا كەتەيٸك, پاتسيەنتتەر سىنعا العان شەشٸم قابىلدانعان كەزەڭدە دەنساۋلىق ساقتاۋ مينيسترلٸگٸندە ۆيتسە-مينيستر قىزمەتٸن اتقارعان ەرجان امانگەلديەۆ قازٸر بۇل لاۋازىمدا جۇمىس ٸستەمەيدٸ. الايدا ازاماتتاردىڭ پٸكٸرٸنشە, سول كەزدە قابىلدانعان شەشٸمدەردٸڭ سالدارى ەلٸ كٷنگە دەيٸن ونكولوگييالىق ناۋقاستارعا كەرٸ ەسەرٸن تيگٸزٸپ وتىر.
