Óńirlerdegi 220-dan astam bilim salasynda sheshim qabyldaý ortalyǵynyń 17-si ǵana qalady. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Bul máseleni birneshe ret talqylaǵan bolatynbyz. Tek qana oblystyq bilim basqarmasy deńgeiinde ǵana emes, aýdandyq, qalalyq bilim bólimderiniń basshylary da qatysty jáne sizder kelisý úshin arnaiy jobany da joldadyq. Bul másele Memleket basshysynyń Joldaýda bergen tapsyrmasynyń aiasynda iske asyrylyp jatyr. Óte mańyzdy reforma. Jalpy sarapshylar kópten beri osy máseleni kóterip júrgenin bilesizder. Eń basty maqsat – bilim sapasyn arttyrý, birizdilikpen qarjylandyrý jáne basqarý problemalaryn sheshý. Munyń aldynda óńirlerde sheshim qabyldaý ortalyqtary 220-dan astam bolsa, endi munan keiin kelesi jyldyń 1 qańtarynan bastap 17 bolady. Jalpy biýdjet te oblys deńgeiinde ortalyqtandyrylady. Oblystyq biýdjetten mektepter, balabaqshalar qarjylandyrylady», - dedi ministr vedomstvonyń apparat jinalysynda.
Onyń atap ótýinshe, bul materialdyq-tehnikalyq bazany nyǵaitýǵa, apatty jaǵdaidaǵy, úsh aýysymdy mektepterdi jáne bilim salasyndaǵy basqa da problemalardy sheshýge septigin tigizetin bolady.
«Endi muny durystap, kezeń-kezeńimen júzege asyrý kerek. Kelesi jylǵy biýdjetti aýdandyq deńgeiden oblystyq deńgeige bergen kezde ártúrli problemalar bolmaýy úshin qazirden bastap bilim basqarmalary baqylaýyna alýy kerek. Birneshe ret jinalys ótkizildi. Óńirler bul máseleni biledi. Baqylaýda ustaý kerek», - Ashat Aimaǵambetov.
