Foto: Úkimet
Premer-ministrdiń orynbasary Serik Jumanǵarin Úkimet otyrysynda aýyldar men shaǵyn qalalardaǵy óndiristi damytýǵa baǵyttalǵan «Isker aimaq» biryńǵai baǵdarlamasyn tanystyrdy, dep habarlaidy Ult.kz.
«Baǵdarlama aýylsharýashylyq shikizatyn qaita óńdeý, shaǵyn naýbaihana, jihaz jáne qurylys materialdaryn óndirý siiaqty tez nátije beretin, tehnologiialyq jaǵynan qarapaiym, jyldam júzege asyrylatyn jobalarǵa baǵyttalǵan», — dep atap ótti Serik Jumanǵarin.
Qarjylyq sharttar
Baǵdarlamada ekinshi deńgeili bankter arqyly jyl saiyn 400 mlrd teńge nesie bólý qarastyrylǵan.
Nesie: bir jobaǵa 200 mln teńgege deiin.
Mólsherlemesi: ~8,8% (40%-y memleketten sýbsidiialanady).
Merzimi: 3 jylǵa deiin.
«Damý» beretin kepildik: kepilge qoiatyn zaty joq nemese jetkiliksiz bolǵan jaǵdaida qaryz somasynyń 85%-yna deiin.
Resýrstar men infraqurylym
Serik Jumanǵarinniń aitýynsha, biznes aqshany ǵana emes, naqty resýrstardy da ala alady, olar – jeńildikpen úi-jailardy, jer telimderin jalǵa alý jáne kommýnikatsiialar júrgizý. Óndiristi tiimdi iske qosý úshin servistik súiemeldeý jáne sol salaǵa baǵyttalǵan onlain-oqytý kýrstary engizilýde. Bul rette memlekettik qoldaýdy alýda basymdyq «Aýyl amanaty» jáne «Bir aýyl – bir ónim» jobalaryna qatysýshylarǵa beriledi.
Ótinimdi qalai berýge bolady?
Ótinimderdi berý egov.business jáne Damu Online portaldary arqyly avtomattandyrylǵan túrde júrgiziledi. Shalǵai aýdandar úshin kóshpeli format qarastyrylǵan: arnaiy mobildi keńseler (avtobýstar) jergilikti jerlerde keńes berip, qujattardy qabyldaidy.
