Almatyda Qazaqstan Respýblikasynyń V qysqy Spartakiadasynyń ashylý saltanatyna arnalǵan baspasóz máslihaty ótti, dep habarlaidy QazAqparat.
Baspasóz máslihatyna Almaty qalasy sport basqarmasyny basshysy Rústem Baiseitov, QR UOK sport direktsiiasynyń direktory Elsiiar Qanaǵatov jáne konkimen júgirýshiler, Jasóspirimder olimpiadasynyń kúmis júldegeri, QR chempionattary, Kýboktarynyń birneshe dúrkin jeńimpazy, 2021 jylǵy Álem kýbogy kezeńiniń qola júldegeri Anvar Mýhamadeev, «Aziia balalary» jarystarynyń jeńimpazy, QR chempionattary Kýboktarynyń birneshe dúrkin jeńimpazy Valerii Klimenko men BAQ ókilderi qatysty.
Almaty qalasy sport basqarmasyny basshysy Rústem Baiseitov Almaty qalasy úshin Qazaqstan Respýblikasynyń qysqy spartakiadasyn ótkizý úlken mártebe ekenin aitty.
«Bizdiń qalamyzǵa qysqy sport túrlerinen elimizdiń eń myqty sportshylary jinaldy. Jarysqa 16 oblys pen respýblikalyq mańyzy bar 3 qalanyń atynan 1300-ge jýyq adamnan quralǵan qurama komandalar qatysýda. Spartakiada baǵdarlamasyna sporttyń 14 túri endi. Olar: biatlon, kerling, konkimen júgirý, mánerlep syrǵanaý, short-trek, shaibaly hokkei (erler), shaibaly hokkei (áielder), taý shańǵysy sporty, aralas shańǵy, shańǵymen sekirý, snoýbord, fristail-mogýl, fristail akrobatika. Qalanyń barlyq sporttyq obektileri jarystardy óttkizýge jaramdy. Spartakiadanyń ashylý saltanaty búgin «Almaty Arena» sport saraiynda ótse, jabylý saltanaty 27 jeltoqsan kúni «Halyq Arena» sport saraiynda ótedi», - dedi Rústem Baiseitov.
Sondai-aq, Almaty qalasy sport basqarmasy basshysynyń aitýynsha, qysqy Sparatkiada qalanyń negizgi sport obektilerinde ótedi.
«Jarystar «Shymbulaq» taý-shańǵy kýrortynda, «Medeý» muz aidynynda, «Almaty Arena», «Halyq Arena» sport sarailarynda, «Suńqar» halyqaralyq shańǵy tramlinder kesheni, «Balýan Sholaq» atyndaǵy sport saraiynda ótedi. Almatynyń qurama komandasynda 200-den astam sportshy bar. Almatylyqtar qysqy sporttyń barlyq túrlerinen qatysady. Olar barlyq daiyndyqtardan ótti. Árine, biz endi sportshylarymyzdan joǵary nátijelerdi kútemiz», - dedi Rústem Baiseitov.
QR UOK sport direktsiiasynyń direktory Elsiiar Qanaǵatovyń aitýynsha, elimizdiń óńirlerinde qysqy sportty damytýǵa durys kóńil bólinbei otyr.
«Qazirgi tańda elimizde qysqy sport túrlerin damytýǵa barlyq jaidǵai jasalǵanmen, árbir óńirde qysqy sport túrlerine arnalǵan jabyq sporttyq keshender az. Olar bizde eki qalada ǵana bar. Olar: Nur-Sultan men Almatyda. Mysaly, konki sportyna bailanysty eshqandai óńirde birde-bir jabyq sporttyq kesheni joq. Biz Qostanai, Soltústik Qazaqstan, Aqmola, Qaraǵandy oblystarynan shyqqan konki sportynyń jaqsy sportyshalaryn bilemiz, biraq, olardyń óz jerlerinde jabyq sporttyq keshenderi joq. Sondyqtan bul máseleni qolǵa alyp, oblystarda qysqy sport túrlerinen jabyq sporttyq keshenderdi kóbeitý kerek dep oilaimyn. Jalpy, Almatyda búgin ótip jatqan Spartakiada óńirlerde qysqy sporttyń qanshalyqty damyp kele jatqanyn kórsetetin bolady», - dedi Elsiiar Qanaǵatov.
Jasóspirimder olimpiadasynyń kúmis júldegeri, QR chempionattary, Kýboktarynyń birneshe dúrkin jeńimpazy, 2021 jylǵy Álem kýbogy kezeńiniń qola júldegeri Anvar Mýhamadeev elimizde qysqy sport túrleri damysa degen tilegin jetkizdi.
«Árine, elimizde sport jaqsy damyp keledi. Biraq, budan da jaqsy damysa eken degim keledi. Sebebi, Qazaqstanda jazǵy sport túrleri jaqsy damyǵan, al qysqy sport túrleri dál solai damyp kele jatyr dep aita almaimyn. Degenmen, bizge qoldaý kórsetiledi, jaqsy nátijelerimiz de bar. Meniń alǵashqy saiysym 22 jeltoqsan kúni bastalady. Men «Medeý» muz aidynynda konkimen 500 jáne 5000 metrge júgiremin. Biz jarysqa jaqsy daiyndyqpen keldik. Aýa raiy jaqsy bolyp, jaqsy nátije kórsetemiz dep oilaimyn», - dedi sportshy.
Al «Aziia balalary» jarystarynyń jeńimpazy, QR chempionattary Kýboktarynyń birneshe dúrkin jeńimpazy Valerii Klimenko sporttaǵy jetistikterine kóp jattyǵýlar arqyly jetkenin aitty.
«Bul Spartakiadaǵa jaqsy daiyndyqpen keldik. Bizdiń oqý-jattyǵý jiyndarynyń ótýine qoldaý jasaldy. Bul meniń alǵashqy Spartakiadam. Maǵan munda bári qyzyq, bári jańa. Men 23-25 jeltoqsan kúnderi «Balýan Sholaq» sport saraiynda qysqa qashyqtyqta konkimen júgiremin», - dedi Valerii.
Esterińizge salsaq, 8-27 jeltoqsan aralyǵynda Almatyda Qazaqstan Respýblikasynyń V qysqy Spartakiadasy ótýde. Jarysty uiymdastyrýshylar Qazaqstan Respýblikasynyń Mádeniet jáne sport ministrligi men Almaty qalasynyń sport basqarmasy.
