QR Premer-Ministri Asqar Maminniń tóraǵalyǵymen ótken Úkimet otyrysynda elimizdiń 2020 jylǵy qańtar-qazandaǵy áleýmettik-ekonomikalyq damý qorytyndysy jáne respýblikalyq biýdjettiń atqarylýy qaraldy, dep habarlaidy primeminister.kz saity.
"2020 jyldyń on aiynyń qorytyndysy boiynsha ekonomikanyń naqty sektory oń ósim qarqynyn kórsetýde. Óńdeý ónerkásibinde 3,2%-ǵa, onyń ishinde azyq-túlik ónimderi óndirisinde 3,4%-ǵa, farmatsevtikada 39,7%-ǵa, daiyn metall buiymdary óndirisinde 19,5%-ǵa, mashina jasaýda 16,5%-ǵa, onyń ishinde avtomobil jasaýda 53,6%-ǵa, sondai-aq qaǵaz óndirisinde 15%-ǵa jáne jeńil ónerkásipte 16,4%-ǵa ósim qamtamasyz etildi.
Qurylys kólemi 10,7%-ǵa, turǵyn úidi paidalanýǵa berý 9,7%-ǵa nemese shamamen 10,7 mln sharshy metrge ulǵaidy. Aýyl sharýashylyǵynda 5,2%-ǵa turaqty ósim qamtamasyz etildi. QR altyn-valiýta rezervteri men Ulttyq qordyń aktivteri biylǵy 1 qazanda $91,1 mlrd qurady", dedi Mamin.
Onyń aitýynsha, temir kenin (+1%) jáne ózge de paidaly qazbalardy (+0,7%) óndirý sekildi taý-ken sektorynyń mańyzdy baǵyttary boiynsha oń dinamika saqtalýda. Bul rette OPEK+ qol jetkizilgen ýaǵdalastyqtardy oryndaý qajettiligi jaǵdaiynda munai óndirýdiń tómendeýi (-4,3%) baiqalady.
Karantindik sharalardyń bolýy jáne kúsheitilýi qyzmet kórsetý salasyna da áser etýde (-6,1%). Sonymen qatar sektor kórsetkishteri birtindep turaqtanyp keledi.
"Aqmola, Túrkistan, Almaty, Jambyl, Qostanai, Mańǵystaý, Pavlodar, Soltústik Qazaqstan oblystary jáne Shymkent qalasy negizgi 8 kórsetkishtiń 5-i boiynsha áleýmettik-ekonomikalyq damý ósimin qamtamasyz etti. 4 kórsetkish boiynsha Aqtóbe, Shyǵys Qazaqstan, Qaraǵandy oblystarynda, Nur-Sultan jáne Almaty qalalarynda oń dinamikaǵa qol jetkizildi" - dedi ol.
Úkimet basshysy óńirlerdiń ákimderine áleýmettik-ekonomikalyq damýdyń josparlanǵan kórsetkishterine qol jetkizý jáne Memleket basshysy alǵa qoiǵan mindetterdi tiimdi iske asyrý úshin barlyq sharalardy qabyldaýdy tapsyrdy.
Premer-Ministr respýblikalyq biýdjettiń kiris bóligin qamtamasyz etý boiynsha sharalar qabyldaý, sondai-aq memlekettik organdar men ákimdikterdiń jyl sońyna deiin biýdjet qarajatyn tolyq ári tiimdi igerýi qajettigine nazar aýdardy.
Aita keteiik, jiynda ekonomikanyń, bank salasynyń jai-kúii, respýblikalyq biýdjettiń atqarylýy, memlekettik satyp alýdaǵy jergilikti qamtý týraly ulttyq ekonomika ministri R. Dálenov, Ulttyq bank tóraǵasy E. Dosaev, qarjy ministri E. Jamaýbaev, ónerkásip pen energetika sektoryndaǵy ahýal týraly indýstriia jáne infraqurylymdyq damý ministri B. Atamqulov jáne energetika ministri N. Noǵaev, agroónerkásiptik keshendegi jaǵdai týraly aýyl sharýashylyǵy ministri S. Omarov, óńirlerdegi ahýal týraly Aqmola oblysynyń ákimi E. Marjyqpaev, Qaraǵandy oblysynyń ákimi J. Qasymbek, Shymkent qalasynyń ákimi M. Áitenov, Batys Qazaqstan oblysynyń ákimi Ǵ. Esqaliev baiandady.
