Óńirlik praimeriz jeńimpazdary respýblikalyq deńgeige ótý úshin pikirsaiysqa qatysady. Bul týraly «Nur Otan» partiiasynyń hatshysy Arman Qyryqbaev aityp berdi, dep habaralidy QazAqparat.
Brifing barysynda partiia hatshysyna Májiliske partiialyq tizim qalyptastyrý jóninde suraq qoiyldy.
«Bul protsess qatań túrde rettelgen, praimerizdi ótkizý erejeleri bar, onda bári kórsetilgen. Qarapaiym tilmen túsindirsem, aýdandyq deńgeidegi máslihattar úshin baiqaý aiaqtaldy dep sanalady, endigi is jergilikti partiialyq organda. Olar aýdandyq deńgeide, filial deńgeiinde, biýro deńgeiinde bekitilýi kerek. Oblystyq deńgeige jáne odan ári Májiliske baratyndarǵa kelsek, bizde reitingtik daýys berý júrgizildi. Aýdandar boiynsha birinshi orynǵa ie bolǵandar – iaǵni birinshi nómir jáne taǵy bir ilespe kandidat, olar ári qarai irikteýge qatysý úshin oblystyq deńgeige jiberiledi», - dep jaýap berdi hatshy QR Prezidenti janyndaǵy Ortalyq kommýnikatsiialar qyzmetinde.
Brifing barysynda spiker barlyq aýdandar men oblys ortalyǵynyń jeńimpazdary arasynda pikirtalas ótetinin aitty.
«Úmitkerler aimaqtyń kvotasyna sáikes usynylady. Mysaly, sailaýshylardyń belgili bir bóligi turatyn Almaty oblysyn alaiyq – daýys berý quqyǵy bar QR barlyq turǵyndarynan osy oblystyń úlesi esepteledi, soǵan sai kvota bolady, osy kvotaǵa sáikes Taldyqorǵan qalasy depýtattar sanyn shyǵarady. Oǵan qosa, olar oblystyq partiia konferentsiiasy barysynda debat júrgizedi. Onyń arasynan jeńimpazdar anyqtalady, keiin olar «Nur Otan» partiiasynan Májiliske partiialyq tizimine engiziledi», - dedi Arman Qyryqbaev.
Eske sala ketsek, «Nur Otan» partiiasynyń hatshysy Arman Qyryqbaev «Praimeriz 2020» ishki partiialyq irikteýiniń negizgi qorytyndysyn baiandady.
Onyń aitýynsha, praimerizge uzyn sany 10 990 kandidat qatysqan jáne onyń 7 143-i ózin-ózi usynǵan. Úmitkerlerdiń ortasha jasy – 43. Onyń 36,7% astamy – áielder, 29% – 35 jasqa deiingi jastar boldy.
.jpeg)