«Fregat» údemeli blogy men britandyq kompaniianyń OneWeb ǵarysh apparaty tielgen «Soiýz-2.1b» zymyrantasyǵyshy Baiqońyr ailaǵynan ǵaryshqa attandy, dep habarlaidy "Ult aqparat".
«Soiýz 2.1b» zymyrantasyǵyshy belgilengen ýaqytta, iaǵni 7 aqpan kúni saǵat 03:42-de Baiqońyr ǵarysh ailaǵynyń №31 alańynan ushyryldy.
Roskosmos bul oqiǵany tikelei efirden kórsetti.
Startqa 40 minýt qalǵanda «Roskosmos-TV» kórermen nazaryna Baiqońyr ailaǵyndaǵy daiyndyq jumysy týraly videosiýjetterdi, Roskosmos pen OneWeb kompaniiasynyń yntymaqtastyǵy týraly mamandarmen suhbatty, «Soiýz 2.1b» zymyrantasyǵyshy ornatylǵan Baiqońyr alańynan tikelei efirdi usyndy.
Nysan shtattyq rejimde ushyryldy. Tikelei efir reportajyn júrgizýshilerdiń sózine sensek, zymyrantasyǵyshtyń aldyńǵy eki basqyshy belgilengen ýaqytta bólinip shyqqan, al «Fregat» údemeli blogynyń bóligi spýtniktermen birge starttan keiin arada 10 minýt ótkende ajyrady.
Ushyrylymnyń tsiklogrammasyna sáikes odan keiingi 3,5 saǵatta ǵarysh apparattary «Fregat-M» údemeli blogynan bólinedi, sóitip orbitadaǵy óz núktelerine jaiǵasady.
OneWeb tómenorbitaldy ǵarysh apparattary jer betindegi tutynýshylardy tikelei spýtnik bailanysy arqyly jyldamdyǵy joǵary internetpen qamtamasyz etýge arnalǵan. Kompaniia jalpy sany 500-den astam spýtnikti Jer ainalasyndaǵy orbitaǵa shyǵaryp, 2020 jyldan bastap olardy kommertsiialyq maqsatta paidalanýdy kózdep otyr. OneWeb 2021 jyldan bastap Jerdi 24-saǵattyq bailanyspen qamtymaq.
Eske sala keteiik, keshe «Soiýz MS-13» ǵarysh kemesiniń ekipajy belgilengen ýaqytta Jezqazǵan qalasynyń mańyna qonǵan bolatyn.
