Adam dúniege kelgen soń artynan arly iz qaldyrý adamzattyq paryz. Bul zańdy qaǵida , sań ǵasyr boiy ózgermeitin aksioma. Al, óner iesiniń izgi joly, urpaqqa úlgi, halyqqa qajet qundylyq. Ónerli jan máńgi jasaidy. Barlyq sanaly ǵumyryn ónerge arnaǵan QR Mádeniet qairatkeri Ábdildenova Kúlásh Qalymqyzy apta buryn aramyzdan ozǵanmen, jyldar boiy jurttyń jadynan ketpei, áriptesteriniń júreginen máńgi oryn alatynyna kúmánimiz joq.
Kúlásh Qalymqyzy 1952 jyly 16-naýryzda Shyǵys Qazaqstan oblysy, Tarbaǵatai aýdany, Aqjar aýylynda dúniege kelgen. Bala kúninen ónerge jany ǵashyq, talaby taýdai Kúlásh Qalymqyzy el yqylasyna erte bólengen jan.
1974 jyldan bastap Abai atyndaǵy qazaq mýzykaly-drama teatrynda qyzmet atqardy. Daryndy aktrisa osy teatr qabyrǵasynda óziniń san qyrly talantyn kórsetip, úlken tarihi tulǵalardy somdap, ónerdiń biigine kóterildi. Tuńǵysh ret Ǵ.Músirepovtyń «Qozy Kórpesh – Baian-sulý» – Baian, «Aqan seri – Aqtoqty»- Aqtoqty, T.Ahtanovtyń «Kúshik kúieý» -Bota rólderin shegine jetkizip oinady. Atalǵan rólder teatr repertýarynyń eń súbeli týyndylary ekenin aita ketkenimiz jón. Osy tarihi tulǵalardy halyq júregine jetkizý jolynda , aktrisanyń daryny, eńbek súigishtigi, talaby aiqyn ańǵaryldy. M.Sársekeevtiń “Zańdy neke” komediiasynyń da janyn kirgizip, joǵarǵy dárejede ótýinge at salysty.
T.Jurtbaevtyń «Qunanabai» tragediiasynda Uljan obrazyn jasap, Jezqazǵan qalasynda ótken Respýblikalyq teatr baiqaýynda erekshe kózge túsip, atalyp óttti. Sol arada otyrǵan teatr synshylary da jyl lebizderin bildirip, teatrymyzdyń abyroiyn aspandatty. K.Ábdildenova san-qyrly sahna sheberi. Osy jyldar ishinde tragediialyq jáne komediialyq spektaklderdiń barlyǵynda basty-basty beinelerdi somdady. Qaraǵandy qalasynda bolǵan teatr baiqaýynda Sh.Aitmatovtyń «Borandy beket» dramasynda Naiman-ana beinesin jasap, teatr mamandarynyń yqylasyna bólenip, «Eń úzdik -Ana» beinesin jasaǵan artis retinde marapattaldy.
Keiingi jyldary sahnada qoiylǵan ózbek dramatýrgi S.Ahmadtyń «Kelinder kóterilisi» komediiasyndaǵy Kúlásh oinaǵan Satty beinesi kórermenderdiń kóńilinen shyǵyp, artistiń san qyrly sheberligi erekshe baiqaldy.
Sonymen qatar Á.Orazbekovtyń «Bir túp alma aǵashy» spektaklinde Ana, Ó.Boranbaevtyń «Sotanaidyń sońǵy úilenýi» qoiylymynda Gúlshatai, J.Qambarovtyń «Júrek jylýy» dramasyndaǵy balalar úiiniń aspazy, qarapaiym ana Marfýǵa beinesin óte sheberlikpen oinap, óziniń keń júrekti, meiirimdi ana ekenin kórsetti.
K.Ábdildenova jas jetkinshekterdiń súiikti artisi. Ol kóptegen ertegilerde Mystan kempir jáne ańdardyń keiipterinde kórine bildi. «Altyn taq», «Batyr Kójek», «Dostyq pen qastyq», «Bir ýys bidai», «Asar» ertegilerinde oinap, balalar júregine erekshe jol tapty. Kúlásh tek Qazaqstan emes, kóptegen shet elderge óner kórsetip, elimizdiń abyroiyn kóterdi. Bizdiń teatrymyz Túrkmenstan, Tájikstan, Qytai ásirese dúniejúzilik Egipet memleketiniń astanasy Kair qalasynda ótken 14-shi Dúniejúzilik tájiribeli teatr festivalinde Kúlásh Ábdildenova somdaǵan Sh.Aitmatovtyń «Borandy beket» dramasyndaǵy Naiman-Ana beinesi erekshe atalyp, Kair festivaliniń katalogine endi.
Kúlásh Qalymqyzy ana beinesin jasaýda ozyq aktrisa. Barlyq tarihi qazaq áielderiniń obrazyn el júregine jetkize bildi.
Qoǵamdyq jumystarda árqashan belsene qatysyp, barlyq sanaly ómirin teatrǵa arnaǵan Kúlásh Ábdildenova ómirden ótse de júrektiń tórinde máńgi qalary sózsiz.
Merei Qartov, Ádebi bólimniń meńgerýshisi
