Taldyqorǵan qalasyndaǵy I. Jansúgirov atyndaǵy Mádeniet saraiynda Eńbek Eri, KSRO jáne Qazaqstannyń Halyq ártisi, teatr jáne kino akteri, rejisser Asanáli Áshimovpen kezdesý ótti. Kezdesý «Rýhani jańǵyrý» baǵdarlamasyna orai elimizdiń aitýly tulǵalarymen, mádeniet jáne óner qairatkerlerimen ótkiziletin «Jetisýdaǵy júzdesý» jobasynyń aiasynda uiymdastyryldy.
Biyl óner tarlany Asanáli Áshimov 80 jasqa toldy. Osy mereitoi aiasynda oblys basshylyǵy jetisýlyqtarmen kezdesýge A. Áshimovti arnaiy shaqyryp, qurmet kórsetti.
Aldymen 80 jyldyq mereitoiǵa arnap túsirilgen «Syr tunǵan Aisberg» atty derekti film kórsetildi. Filmde akterdiń ómiri men shyǵarmashylyǵy qatar órilip berilgen. Ómirdiń san qily belesteri, qiyndyqtary men qyzyǵy, úmit pen senim, qajyr men qairat – júrip ótken baspaldaqtarynyń barlyǵy da kórermenniń kóz aldynan tizbektele ótti.
Munan soń kópshiliktiń ystyq yqylas, qol shapalaqtaýymen sahnaǵa kóterilgen Asanáli Áshimov jetisýlyq qaýymǵa rizashylyǵyn bildirip, ómir týraly, óner týraly ishki tolǵamdarymen bólisti. Sahnaǵa shyqqan akterdiń jary Baǵdat, qyzy Saǵina men uly Asanáli de aty ańyzǵa ainalǵan talant iesiniń qamqor otaǵasy, ardaqty áke retindegi bolmysyna sóz arnady.
Kesh sońynda oblys ákimi Amandyq Batalov óziniń Almaty qalasynda qurylys salasynda eńbek etip, «Qazaqfilm» kinostýdiiasyn turǵyzǵan kezdegi Asanáli Áshimovpen alǵash kezdesken sátterinen estelik aitty.
- Sizdi qazaq teatr jáne kino óneriniń metri dep maqtanyshpen aitamyz. Jetisý jurtshylyǵynyń sizge degen yqylasy bólek. Qaitalanbas qoltańbańyzdy baǵamdaý, ónerdegi baspaldaqtaryńyz, ómirlik tájiribeńiz qoǵam úshin, keiingi jas býyn úshin asa qajet. Sondyqtan mundai kezdesýlerdiń mańyzy zor dep esepteimin. Qazaq ónerine qyzmet ete berińiz. Jasyńyz júzge jetsin! – dedi A. Batalov.
Munan soń abyz aqsaqaldyń iyǵyna shapan jaýyp, syi-siiapat kórsetti.
Kezdesý sońynda jurtshylyq Asanáli aqsaqalmen emin-erkin tildesip, qoltańba alyp, estelikke sýretke tústi.
