Premer-ministrdiń birinshi orynbasary Roman Skliar avtosalondarǵa eskertý jasady, dep habarlaidy Sputnik Qazaqstan.
Búgin halyqaralyq kólik jasaýshylar forýmyna qatysqan Skliar Qazaqstandaǵy kólik baǵasyna qatysty pikir bildirdi.
Onyń aitýynsha, dilerler zań aiasynda jumys isteidi. Olar kólikti shetelde satyp alyp, Qazaqstanda ótkize alady. Alaida qosymsha qyzmetterdi tyqpalai berýge bolmaidy.
"Avtosalondarda qosymsha qyzmetterdi usynatyndarmen tiisti memlekettik organdar ainalysýy tiis. Ondai bolmaýy kerek", - deidi Skliar.
Osy oraida avtosalondar qyzmeti indýstriia jáne saýda ministrlikteriniń quziretine jatady. Dál osy memlekettik organdar tártip buzýshylyqtardyń anyqtaýǵa mindetti. Skliar Qazaqstandaǵy sheteldik kólikterge baǵa belgilý júiesi ashyq emes dep sanaidy. Al otandyq kólikterdiń ústeme aqysy kóp emes.
"Qazaqstanda kólikti usaq qurastyrý jelisi bolsyn, iri qurastyrý jelisi bolsyn, shyǵarylǵan ónimniń baǵasy belgili. Sosyn "Ónerkásiptik saiasat týraly" zańǵa sáikes, mashkomplektterdi shyǵaratyn zaýyt pen bizdiń zaýytymyzdyń arasynda deldaldar bolmaýy kerek. Sondyqtan olar lokalizatsiia týraly aitqanda, máselen, 32 protsent deidi ǵoi, bunyń bári – ózimizdiń kólik óndirýshi kompaniianyń tapqan tabysy. Odan keiin daiyn ónimdi dilerge jiberiledi, ol ústeme baǵasyn qosyp satady", - dep atap kórsetti Skliar.
Premer-ministrdiń orynbasary kólikterdiń Qazaqstanda ǵana emes, álem boiynsha qymbattap jatqanyn da jetkizdi.
Al otandyq óndirýshiler metaldyń qymbattaýyna, tasymal men logistikanyń ózgerýine áser ete almaidy.
