Sońǵy úsh jylda elimizde 45 950 jol-kólik oqiǵasy tirkeldi. Bul týraly Senattyń jalpy otyrysynda depýtat Nurlan Beknazarov málim etti, dep habarlaidy "Ult aqparat".
Aita keteiik, jalpy otyrysta «Qazaqstan Respýblikasynyń keibir zańnamalyq aktilerine jol júrisi máseleleri boiynsha ózgerister men tolyqtyrý engizý týraly» Zańy eki oqylymda qaralyp, qabyldandy.
Bul qujatty qabyldaý kólik quralynyń júrgizýshisine talap etiletin qujattar sanyn qysqartýǵa, avtobýs parkteriniń jyljymaly quramyn jańartýǵa, ekologiialyq jaǵdaidy jaqsartýǵa, jolaýshylar tasymalynyń sapasy men qaýipsizdigin arttyrýǵa múmkindik beredi.
«Qazaqstan Respýblikasy Ishki ister ministrliginiń usynǵan málimetterine sáikes, sońǵy úsh jylda elimizde 45 950 jol-kólik oqiǵasy tirkelip, saldarynan 60 469 adam ártúrli deńgeidegi dene jaraqatyn alyp, 6498 adam qaza bolǵan. Jol júrisi qaýipsizdigin qamtamasyz etýge qatysty birqatar is-sharalar atqarylyp, jol-kólik oqiǵalarynyń sany sońǵy jyldary azaiǵanymen, bul másele ózekti bolyp qalyp otyr, onyń birneshe sebepteri bar», - dedi Senat depýtaty Nurlan Beknazarov.
Onyń aitýynsha, solardyń negizgileriniń biri – tehnikalyq jaǵdaiy talapqa sai kelmeitin, eskirgen kólik quraldarynyń jolaýshylardy tasymaldaý salasynda qoldanylýy. Mysaly, resmi málimetterge sáikes qazirgi kezde elimizde árbir úshinshi avtobýs jiyrma jyldan astam ýaqyt boiy paidalanylyp keledi.
«Bul kórsetkish jol-kólik oqiǵalary sanynyń kóbeiip, azamattardyń zardap shegýine ákelýde, sondyqtan jolaýshylar tasymaldaityn avtobýstardy jańartý qajettigi týyndap otyr. Osy oraida «Jol júrisi týraly» Zańǵa on jyldan asa paidalanyp kelgen avtobýstardy bastapqy tirkeýden ótkizýge tyiym salatyn túzetý usynyldy jáne bul normany 2022 jylǵy 1 qańtardan bastap engizý kózdelip otyr. Jalpy zań jobasyn qabyldaý azamattarymyzǵa qolaily jaǵdai jasaýǵa jáne quqyq qorǵaý organdarynyń qyzmetin ońtailandyrýǵa oń áserin tigizedi», - dedi senator.
