Nesie alýda kepildiktiń bolmaýy kóp kásipkerlerge, ásirese shaǵyn biznes ielerine qolbailaý bolýda.
Túrkistan oblysynyń ákimi Ómirzaq Shókeev óńirdiń shaǵyn biznes ieleri men jas kásipkerlermen tanysyp, kókeiinde júrgen máselelerdi birlese talqylady, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Baspasóz qyzmetiniń málámtterine qaraǵanda, ortaǵa salynǵan máselelerdiń basym bóligi qoljetimdi nesielerdi alý aiasynda boldy. Qańtarda ótken Úkimettiń keńeitilgen otyrysynda Prezident Qasym-Jomart Toqaev «shaǵyn jáne orta bizneske qoldaý kórsetý eń basty nazarda bolýǵa tiis» ekendigin atap ótti. Sondai-aq Memleket basshysy shaǵyn nesielerdiń kólemin ulǵaityp, halyqqa beriletin shaǵyn nesielerdiń mólsherin 6 paiyzdan asyrmaýdy tapsyrdy.
Shaǵyn biznesti qoldaý maqsatynda «Biznestiń jol kartasy 2025» baǵdarlamasyna jańa qural iske qosylyp, tyǵyryqtan shyǵar jol tabyldy. 5 mln. teńgege deiin eki jylǵa kepildiksiz nesiege ie bolý úshin nebári jarty saǵat ýaqyt ketedi. Ol úshin jeke kýálik pen kásipkerlik qujattyń bolýy jetkilikti.
«Búgingi kezdesýimizdiń basty sebebi, osy jaǵymdy jańalyqty ózderińizben bólisip, júzege asyrylý tetigin naqty is júzinde kórsetý bolyp otyr. Shaǵyn onyń ishinde mikrokásipkerlik sýbektileri ainalym qarajatyn tolyqtyrý úshin 5 mln. teńgege deiin 6 paiyzdyq nesieni eshqandai kepildiksiz alýǵa múmkindigi bar. Bul qarjy quraly az ýaqyt ishinde biznes úshin pármendi qoldaýǵa ainaldy. Osy múmkindikti paidalana otyryp, kásipkerlerge qulaqqaǵys jasaǵym keledi. Qurmetti kásipkerler! Biznes úshin jasalyp jatqan qoldaýlardyń aýqymy Tuńǵysh Prezident – Elbasy N.Á.Nazarbaevtyń, Memleket basshysy Q.K.Toqaevtyń kásipkerlerdi qoldaý saiasatynyń aiqyn dáleli. Memlekettik qoldaý sharalaryn barsha túrkistandyqtarǵa jetkizip, árbir kásipkerdi qoldaýdan tys qaldyrmaý – basty mindet. Sondyqtan da, barlyq kásipkerlerdi osy is-sharalarǵa belsendi qatysýǵa shaqyramyn»,- dedi oblys ákimi Ómirzaq Shókeev.
Túrkistan oblysy boiynsha nesieler Halyq Banki, Bank TsentrKredit, Sberbank arqyly usynylýda. Nebári sońǵy bir aidyń ishinde 200-den astam nesie maquldanyp, 62 kásipker qarjylandyryldy.
Aita ketý kerek, memlekettik qoldaý sharalarynyń kásipkerler úshin qoljetimdiligin arttyrý, óńirdegi biznes ahýaldy jaqsartý ákimdik jumysynyń basty baǵytynyń biri. Esepti jylda «Qarapaiym zattar ekonomikasy», «Biznestiń jol kartasy 2025» baǵdarlamalary arqyly kásipkerler 50,7 mlrd. teńgege jeńildetilgen 6%-dyq nesiemen qamtamasyz etildi. Ótken jyly órshigen epidemiialyq ahýalǵa qaramastan Túrkistan kásipkerleri belsendilik tanytyp, nesielerdiń kólemi 1,3 ese artty.
Oblys aýmaǵynda 140 605 shaǵyn jáne orta kásiporyn jumys istep tur. Sońǵy 2,5 jylda olardyń sany 14 myńǵa ósken. Bul salada 200 myńnan astam adam jumyspen qamtylǵan. Pandemiiaǵa qaramastan shaǵyn jáne orta kásipkerliktiń ónim kólemi 16%-ǵa artyp (ósim boiynsha Respýblikada 2 oryn), 554,4 mlrd. teńgege (9 ai) jetti. 2021 jylda 1 trln. teńgege jetkizý josparlanýda.
