Foto: RIA Novosti
Elordada respiratorlyq virýstyq aýrýlardyń ósýi erekshe baiqalyp otyr, ásirese koronavirýstyq infektsiia eriksiz alańdaýshylyq týdyrýda. Dárigerler úshin eresekterge de, balalarǵa da birdei áser etetin jańa «omikron» shtamynyń paida bolýy qiyndyq týdyryp otyr. Balalar juqpaly aýrýlary kafedrasynyń meńgerýshisi, dáriger-infektsionist Dinagúl Baesheva infektsiianyń qaýpi jáne onyń taralýynyń aldyn alý joldary týraly aitty, dep habarlaidy Nur-Sultan ákimdiginiń resmi saity.
Dinagúl Baeshevanyń aitýynsha qazir respiratorlyq virýstyq aýrýlar deńgeiiniń kóterilýi kezeńinde tumaýmen qatar koronavirýstyq infektsiia erekshe alańdaýshylyq týdyrýda.
«Bul problema áli de ózekti bolyp sanalady, óitkeni elimizde asa juqpaly «omikron» shtamy paida boldy. Onyń berilý jyldamdyǵy «delta» shtamynan birneshe ese joǵary. Kez kelgen jastaǵy adamǵa, onyń ishinde balalarǵa da ońai tiip jatqan joq. Sheteldik dárigerlerdiń málimetinshe, «omikron» balalarda da aýyr ótip jatyr, ony biz de óz kózimizben kórip otyrmyz. Koronavirýstyń qandai shtamy bolmasyn immýnokomprometirlengen adamdarda, qosymsha aýrýy bar naýqastarda, sol siiaqty onkologiialyq aýrýlarmen, immýn tapshylyǵy jaǵdailarymen jáne ózge de ilespe aýrýlarmen aýyratyn naýqastarda erekshe aýyr ótedi», - dep túsindirdi dáriger.
Onyń aitýynsha aýrýdyń eksponentsialdy túrde ósip ketpeýi jáne kúnine myń nemese odan da kóp adam aýyrmaýy mańyzdy.
Ol úshin azamattar epidemiiaǵa qarsy is-sharalardy qatań saqtaýy tiis: áleýmettik qashyqtyq, maska rejimi, qol jýý, qoldy kózdiń jáne murynnyń shyryshty qabatyna tigizbeý, adam kóp jinalatyn oryndarǵa barmaý.
«Ókinishke qarai, biz kishkentai balasy bar ata-analardyń saýda ortalyqtarynda alańsyz serýendep júrgenin jii kóremiz. Qazirgidei jaǵdaida mundai oryndarda demalý orynsyz. Eger balańyzdyń densaýlyǵyn oilasańyz, barynsha túsinistikpen qarap, oqshaýlanǵan oryndarda demalǵanyńyz jón. Biz elimizdegi barlyq statsionarlar boiynsha taldaý júrgizip, 2021 jáne 2020 jyldary koronavirýstyq infektsiiamen aýyrǵandardyń sanyn salystyrdyq. Nátijesinde 2021 jyly KVI-men aýyratyndar sany 5 ese, al aýyr naýqastar sany 20 ese óskenin kórdik», - dedi infektsionist.
Ol ata-analardy balalarynyń respiratorly aýrý belgileri bar týystarymen, jaqyndarymen, tanystarymen qarym-qatynasta bolmaý kerektigin airyqsha atap ótti. Sebebi koronavirýstyń belgileri uqsas: jutqynshaqtyń aýyrýy, jótel jáne t. b.
Dáriger vaktsinatsiiany COVID-19-dan qorǵanýdyń ońtaily jáne tiimdi sharasy dep atady.
«Búkil álemdik qaýymdastyq vaktsinatsiianyń tiimdiligine kóz jetkizdi. Eger balamyzdy aýyr asqynýlardan saqtaǵymyz kelse mindetti túrde vaktsinatsiialaýymyz kerek. 2021 jyly vaktsinatsiiany ýaqytyly alǵandardy qutqarý múmkin boldy, al vaktsinanyń tólqujatyn satyp alǵandardan aiyrylyp qaldyq. Balalar bul aýrýdy ońai ótkerse de virýstyń keiingi saldary qandai bolaryn bilmeimiz. Koronavirýsqa qarsy vaktsinatsiia búgingi tańda eń tiimdi aldyn alý sharalarynyń biri bolyp sanalady», - dep qorytyndylady Dinagúl Baesheva.
