Astana qalalyq sotynda 26 jastaǵy Eskendir Súleimenov kóz jumǵan jol apatyna qatysty is boiynsha apelliatsiialyq alqanyń sheshimi shyqty, dep habarlaidy Sputnik Qazaqstan.
"Is materialdaryn zerdelei kele, sot alqasy úkimdi ózgerissiz qaldyrýdy sheshti", — dep málimdedi apelltsiialyq sheshimdi oqyǵan sýdia Ásem Ramazanova.
Sýdia aýdandyq sottyń sheshimi ádildiktiń barlyq qaǵidatyna tolyǵymen jaýap beretinin atap ótti.
Eske sala ketsek, jol apaty 2018 jyldyń 22 maýsymynda Astanadaǵy Máńgilik el – Kerei Jánibek handar kósheleriniń qiylysynda boldy. Qyzylorda oblysy ishki ister departamentiniń bastyǵy, politsiia polkovnigi Qairat Muhitovtiń qyzy Malika Muhitova mototsiklmen kele jatqan Eskendir Súleimenovti qaǵyp ketti. Belgili aqyn Oljas Súleimenovtiń 26 jastaǵy jieni oqiǵa ornynda kóz jumdy.
Qarasha aiynyń ortasynda 29 jastaǵy Malika Muhitova QR Qylmystyq kodeksi 345-baby 3-tarmaǵy boiynsha (Jol qozǵalysy nemese kólikti paidalaný erejeleriniń buzylýynan abaisyzda adam ólimine ákep soqqan áreket) kináli dep tanyldy. Sot úkimimen ol qaýipsizdigi tómen qylmystyq-atqarý júiesi mekemesinde jazasyn óteýmen eki jylǵa bas bostandyǵynan aiyryldy.
Keiinirek sottalýshynyń advokaty Dmitrii Kýriachenko sot úkimine shaǵym túsirdi. Apelliatsiialyq shaǵym boiynsha sýdia Ásem Ramazanovanyń tóraǵalyǵymen úsh sot otyrysy ótti.
Marqumnyń atasy, belgili aqyn Oljas Súleimenov otbasynyń úlkeni retinde Muhitovanyń jazasyn jeńildetý týraly ótinishpen sotqa eki ret júgindi. Alaida Súleimenovtiń eki haty da is materialdaryna jeke adamnyń pikiri retinde qosyldy. Jas jigittiń ata-anasy sottan úkimdi ózgerissiz qaldyrýdy surady.
