Oljas Súleimenovtiń 26 jastaǵy nemeresi Eskendir Súleimenovtiń kóz jumýyna sebepker bolǵan jol-kólik oqiǵasyna qatysty sot isine núkte qoiyldy, dep habarlaidy "Ult aqparat".
«Sot Malika Muhitovany QR Qylmystyq kodeksiniń 345-baby 3-bóligi boiynsha kináli dep taýyp, qaýipsizdigi minimaldy túzetý mekemesinde eki jylǵa bas bostandyǵynan aiyrý týraly, 5 jylǵa kólik júrgizý quqyǵynan aiyrý týraly úkim shyǵarady», - dedi iske qatysty úkim shyǵarǵan sýdia Qanat Tobaǵaliuly.
Malika Muhitova sonymen birge sot protsesi kezinde ketken 324 myń teńgelik protsessýaldyq shyǵyndy óteitin boldy.
"Sizdiń tarapyńyzdan zań buzýshylyqtar bolǵannan keiin, sot sizdi qylmystyq zań buzýshylyq jasaǵanyńyz úshin aiypty dep tanydy. Barlyq sarapshydan jaýap alynǵannan keiin, sot osyndai qorytyndyǵa kelip otyr. Sizdiń tatýlasýǵa nietińiz bolǵany eskerildi, alaida zardap shekken taraptyń ustanymyn eskere otyryp, sot qatań jaza belgiledi. Degenmen sot sizdi úkim zańdy kúshine engenge deiin qamaýǵa almaidy. Eger siz úkimmen kelispeseńiz, 15 kún ishinde shaǵymdana alasyz", — dep túsindirdi sýdia Qanat Tobaǵaliuly.
Al, Sputnik agenttiginiń habarlaýynsha, Malika Muhitovanyń advokaty Dmitrii Kýriachenko sot úkimine shaǵym túsiretinin málimdegen.
"Sot úkimine shaǵym túsirýge 15 kún beriledi. Meniń qorǵaýymdaǵy adam bul múmkindikti paidalanady dep oilaimyn. Ol óz kinásin moiyndap otyr. Biraq men qorǵaýshy retinde onyń bul istegi jaǵdaiyn jeńildetý úshin barlyq múmkindikti, amal-tásilderdi qoldanýym kerek", — dedi ol.
Eske sala ketsek, osy maýsym aiynda Astanadaǵy jol apatynda Oljas Súleimenovtiń 26 jastaǵy nemeresi Eskendir Súleimenov mert bolǵan edi. Eskendir tizgindegen mototsikl qiylysqa shyqqan kólikke soǵyldy.
Arada kóp ótpei Astana qalalyq Ishki ister departamenti apatqa sebepker bolýy múmkin Hyundai avtokóliginiń iesi, 29 jastaǵy astanalyq kelinshekke qatysty tergeý amaldary júrip jatqanyn habarlaǵan edi.
Aita ketsek, 12 qazanda Oljas Súleimenovtiń nemeresiniń ólimine qatysty sot protsesi bastalyp, Eskendir Súleimenov qaza tapqan jol apaty boiynsha sottalýshy Malika Muhitova marqumnyń ata-anasynan keshirim suraǵan edi.
Is boiynsha prokýror Á.Baraev sottan aiyptalýshyny 2 jylǵa bas bostandyǵynan aiyrýdy suraǵan edi.
sýret: Sputnik
