ولجاس سٷلەيمەنوۆتٸڭ 26 جاستاعى نەمەرەسٸ ەسكەندٸر سٷلەيمەنوۆتٸڭ كٶز جۇمۋىنا سەبەپكەر بولعان جول-كٶلٸك وقيعاسىنا قاتىستى سوت ٸسٸنە نٷكتە قويىلدى, دەپ حابارلايدى "ۇلت اقپارات".
«سوت ماليكا مۇحيتوۆانى قر قىلمىستىق كودەكسٸنٸڭ 345-بابى 3-بٶلٸگٸ بويىنشا كٸنەلٸ دەپ تاۋىپ, قاۋٸپسٸزدٸگٸ مينيمالدى تٷزەتۋ مەكەمەسٸندە ەكٸ جىلعا باس بوستاندىعىنان ايىرۋ تۋرالى, 5 جىلعا كٶلٸك جٷرگٸزۋ قۇقىعىنان ايىرۋ تۋرالى ٷكٸم شىعارادى», - دەدٸ ٸسكە قاتىستى ٷكٸم شىعارعان سۋديا قانات توباعاليۇلى.
ماليكا مۇحيتوۆا سونىمەن بٸرگە سوت پروتسەسٸ كەزٸندە كەتكەن 324 مىڭ تەڭگەلٸك پروتسەسسۋالدىق شىعىندى ٶتەيتٸن بولدى.
"سٸزدٸڭ تاراپىڭىزدان زاڭ بۇزۋشىلىقتار بولعاننان كەيٸن, سوت سٸزدٸ قىلمىستىق زاڭ بۇزۋشىلىق جاساعانىڭىز ٷشٸن ايىپتى دەپ تانىدى. بارلىق ساراپشىدان جاۋاپ الىنعاننان كەيٸن, سوت وسىنداي قورىتىندىعا كەلٸپ وتىر. سٸزدٸڭ تاتۋلاسۋعا نيەتٸڭٸز بولعانى ەسكەرٸلدٸ, الايدا زارداپ شەككەن تاراپتىڭ ۇستانىمىن ەسكەرە وتىرىپ, سوت قاتاڭ جازا بەلگٸلەدٸ. دەگەنمەن سوت سٸزدٸ ٷكٸم زاڭدى كٷشٸنە ەنگەنگە دەيٸن قاماۋعا المايدى. ەگەر سٸز ٷكٸممەن كەلٸسپەسەڭٸز, 15 كٷن ٸشٸندە شاعىمدانا الاسىز", — دەپ تٷسٸندٸردٸ سۋديا قانات توباعاليۇلى.
ال, Sputnik اگەنتتٸگٸنٸڭ حابارلاۋىنشا, ماليكا مۇحيتوۆانىڭ ادۆوكاتى دميتريي كۋرياچەنكو سوت ٷكٸمٸنە شاعىم تٷسٸرەتٸنٸن مەلٸمدەگەن.
"سوت ٷكٸمٸنە شاعىم تٷسٸرۋگە 15 كٷن بەرٸلەدٸ. مەنٸڭ قورعاۋىمداعى ادام بۇل مٷمكٸندٸكتٸ پايدالانادى دەپ ويلايمىن. ول ٶز كٸنەسٸن مويىنداپ وتىر. بٸراق مەن قورعاۋشى رەتٸندە ونىڭ بۇل ٸستەگٸ جاعدايىن جەڭٸلدەتۋ ٷشٸن بارلىق مٷمكٸندٸكتٸ, امال-تەسٸلدەردٸ قولدانۋىم كەرەك", — دەدٸ ول.
ەسكە سالا كەتسەك, وسى ماۋسىم ايىندا استاناداعى جول اپاتىندا ولجاس سٷلەيمەنوۆتٸڭ 26 جاستاعى نەمەرەسٸ ەسكەندٸر سٷلەيمەنوۆ مەرت بولعان ەدٸ. ەسكەندٸر تٸزگٸندەگەن موتوتسيكل قيىلىسقا شىققان كٶلٸككە سوعىلدى.
ارادا كٶپ ٶتپەي استانا قالالىق ٸشكٸ ٸستەر دەپارتامەنتٸ اپاتقا سەبەپكەر بولۋى مٷمكٸن Hyundai اۆتوكٶلٸگٸنٸڭ يەسٸ, 29 جاستاعى استانالىق كەلٸنشەككە قاتىستى تەرگەۋ امالدارى جٷرٸپ جاتقانىن حابارلاعان ەدٸ.
ايتا كەتسەك, 12 قازاندا ولجاس سٷلەيمەنوۆتٸڭ نەمەرەسٸنٸڭ ٶلٸمٸنە قاتىستى سوت پروتسەسٸ باستالىپ, ەسكەندٸر سٷلەيمەنوۆ قازا تاپقان جول اپاتى بويىنشا سوتتالۋشى ماليكا مۇحيتوۆا مارقۇمنىڭ اتا-اناسىنان كەشٸرٸم سۇراعان ەدٸ.
ٸس بويىنشا پروكۋرور ە.باراەۆ سوتتان ايىپتالۋشىنى 2 جىلعا باس بوستاندىعىنان ايىرۋدى سۇراعان ەدٸ.
سۋرەت: Sputnik
