Astanada Oljas Súleimenovtiń nemeresi, 27 jastaǵy Eskendir Súleimenov qaza tapqan jol apatyna qatysty alǵashqy sot otyrysy ótti, dep jazady Sputnik.
Eskendir Súleimenov pen Qyzylorda oblysy ishki ister departamenti bastyǵynyń qyzy Malika Muhitova 22 maýsym kúni Astanadaǵy kóshe qiylystarynyń birinde jol apatyna ushyraǵan bolatyn.
Astana qalasy Esil aýdanynyń ekinshi qalalyq sotynyń sýdiasy Qanat Tobaǵaliuly otyrys bastalǵannan keiin 29 jastaǵy Malika Muhitovaǵa Qazaqstan Qylmystyq kodeksiniń 345-baby úshinshi bóligi (jol qozǵalysy erejesin buzý) boiynsha aiyp taǵylyp otyrǵanyn málimdedi.
Sodan keiin qos tarap tyńdaldy. Muhitovanyń advokaty Dmitrii Kýriachenko úsh pýnkt boiynsha: sot talqylaýyn keiinge qaldyrýǵa, is boiynsha qosymsha kýágerlerdi shaqyrýǵa jáne Muhitovanyń avtokóliginiń jyldamdyǵyn anyqtaý úshin qosymsha saraptama júrgizýge ótinish berdi.
Advokattyń aitýynsha, júrgizilgen eki tekseris mototsikl júrgizýshisi Eskendir Súleimenovtiń qozǵalys jyldamdyǵyn ǵana anyqtaǵan.
"Sarapshylar avtokóliktiń jyldamdyǵyn anyqtamady, qyz joldy kesip ótken ýaqyt anyqtaldy, alaida oǵan jyldamdyq rejimine qatysty aiyp taǵylyp otyr. Bul onyń zań buzýshylyqtarynyń biri sanalady. Oqiǵanyń qisynyna súiene otyryp, adamdy jyldamdyqty asyrdy dep aiyptaýdan buryn, sol jyldamdyqty anyqtaý kerek ekenin jaqsy túsinemin. Eskendir Súleimenovtiń jyldamdyǵy saǵatyna 88 shaqyrymdy quraǵan. Sarapshy osyndai tujyrymǵa keldi" — dedi qorǵaýshy jýrnalisterge.
Sonymen qatar, Dmitrii Kýriachenko aiyptalýshy taraptyń zardap shekken tarapqa materialdyq shyǵyndy tóleýge daiyn ekenin málimdedi.
Zardap shekken taraptyń advokaty Damir Sandinov Súleimenovtar otbasy beibit kelisimge kelip, shyǵyndy óndirýge daiyn ba, joq pa degen suraqqa jaýap bermedi. Súleimenovtyń qorǵaýshysy Eskendirdiń týystary basqa qalada turatyndyqtan kelesi kezdesýdi keiinge qaldyrýǵa ótinish berdi.
"Sot zardap shegýshiniń ókili Sandinov Damir Nurahmetulynyń ótinishin qanaǵattandyryp, qylmystyq isti qaraýdy 17 qazan saǵat 15.00-ge keiinge qaldyrady", — dedi sýdia Qanat Tobaǵaliuly.
Aiyptalýshy Malika Muhitova "Samuryq-Qazyna" ulttyq kompaniiasynda jumys isteitini belgili boldy, turmys qurmaǵan, buryn sottalmaǵan.
27 jastaǵy Eskendir Súleimenov avtokólikpen soqtyǵysqan kezde mototsiklmen kele jatqan. Oqiǵadan keiin Astana qalasynyń IID bastyǵynyń orynbasary Sanjar Ádilov mototsikl júrgizýshisi jyldamdyq rejimin buzbaǵanyn habarlady. Eskendir Súleimenov Almatyda 25 maýsym kúni jerlendi.
