Qazaqstannyń halyq jazýshysy, aqyn, qoǵam qairatkeri Oljas Súleimenov áielimen birge koronavirýstan emdelip jatyr, dep habarlaidy "Ult aqparat".
Almaty qalalyq qoǵamdyq densaýlyq basqarmasynyń habarlaýynsha, Oljas Súleimenov pen jary Margarita Vladimirovna 2021 jyldyń 5 qańtarynan bastap Almaty qalalyq klinikalyq infektsiialyq aýrýhanada emdelip jatyr. Olarǵa jeńil dárejedegi koronavirýs diagnozy qoiylǵan.
"Naýqastar jaǵdaiynyń jaqsarýyna bailanysty 15 qańtarda úide emdelýge shyǵarý josparlanǵan", - dedi basqarmanyń baspasóz qyzmeti.
Súleimenov pen jarynyń koronavirýs juqtyrǵany týraly Facebook jelisinde Bigeldi Ǵabdýllin jazdy.
"Oljas Omaruly Súleimenov jáne onyń jubaiy Margarita Vladimirovna ortalyq klinikalyq aýrýhanada bir apta boiy profilaktikada jatty, shamasy olar qarǵys atqan virýsty sol jerde juqtyrdy. Búgin arnaiy brigada olardy koronavirýs juqtyrǵandarǵa arnalǵan aýrahanaǵa apardy. Ol jaqqa kirgizbeidi. Margarita Vladimirovna Oljekeńe qaraǵanda aýyr halde jatyr. Dárigerler qoldan kelgenniń bárin jasaýda. Olardyń qyzy Mádinamen sóilestim. Ol alańdaýǵa negiz joq ekenin, emdeý qalypty júrip jatqanyn aitty", - dedi Ǵabdýllin.
Aita keteiik, aqyn, ádebiettanýshy, lingvist-zertteýshi, túrkolog, memleket jáne qoǵam qairatkeri Oljas Súleimenov 1936 jyly 18 mamyrda Almaty qalasynda dúniege kelgen. 2020 jyldyń jeltoqsanynda Súleimenov IýNESKO aiasynda qurylǵan Mádenietterdi jaqyndastyrý halyqaralyq ortalyǵynyń direktory boldy.
