Ekonomist Oljas Qudaibergenov aldaǵy Májilis sailaýynda partiialar arasyndaǵy depýtattyq mandat qalai bólinýi múmkindigine boljam jasady, dep habarlaidy QazAqparat.
«Búgin Májilis pen máslihat sailaýy jariialandy. Alǵash ret sailaýlar merziminen buryn emes, Konstitýtsiiamen belgilengen ýaqytta, 10 qańtarda ótedi. 2,5 ai ǵana ýaqyt qaldy. Ázirshe barlyq partiialardyń ishinde Nur-Otan ǵana belsendi daiyndalyp, qazaqstandyq oryndaýdaǵy praimeriz ótkizdi. Qalai desek te zombi-partiialarǵa qaraǵanda, bul belsendilik sanalady. Olardyń reitingteri árqaisysynda, tipti bárin qosqanda 1 paiyzdan áreń asady. Nur-Otan reitingine keler bolsaq, shamamen 70-80 paiyz daýys jinaýǵa múmkindik beretin túrli qurylymdary jandandy. Bul reitingke sený ne senbeý árkimniń jeke isi. Degenmen, saýalnama júrgizetinderge jáne reitingterdi naqtylaityndarǵa jaqsy qarajat tabýǵa múmkindik týyp otyr», - dep jazdy ol Facebook paraqshasynda.
Onyń atap ótýinshe, barlyq derlik ákimshilik elita kiretin Nur-Otan-nyń jeńisi men jeńilisi avtomatty túrde partiia esebine jazylady. Buǵan qosa, dál osy jait partiianyń jergilikti jerlerdegi jumysyn jandandyrýǵa múmkindik beredi.
«Zombi partiialar bar, olardyń keibirinde tipti teris te kapital oryn alyp tur. Qorytyndysynda básekelestik joq. Al bul sailaýdyń súreńsiz ári sodan keiin Májilistiń qyzyqsyz bolýyna alyp keledi. Partiialar arasynda shynaiy básekelestik bolýy úshin partiialyq alańda tym bolmaǵan bir, múmkin odan da kóp jańa partiianyń paida bolatyndyǵyna úmit artamyn. Bul halyqtyń narazylyq gradýsyn tómendetip, Májilis sailaýyna degen senimdi arttyryp, depýtattardyń/partiianyń óz sailaýshylary aldyndaǵy kásibiligi men jaýapkershiligin arttyra túser edi. Saýalnamaǵa qaraǵanda, jańa partiia birden 30 paiyz mandat alýy múmkin. Nur-Otan 70, al jańa partiia 30 paiyz oryn alǵan jaǵdaidyń ózinde tamasha básekelestik bolar edi», - dedi Oljas Qudaibergenov.
