Nazarbayev University-de Qazaqstan Premer-Ministri Oljas Bektenovtiń tóraǵalyǵymen Nazarbaev Ýniversiteti, Nazarbaev Ziiatkerlik mektepteri jáne Nazarbaev Qory Joǵary Qamqorshylyq keńesiniń otyrysy ótti. Bul týraly Premer-ministrdiń resmi saity habarlaidy.
Keńes músheleri NU-dyń joǵary fýnktsionaldy zerthanalarymen jáne ǵalymdardyń jańa ázirlemelerimen, atap aitqanda Aqyldy júieler jáne jasandy intellekt institýtymen, impýlstik údetkish zerthanasymen, zamanaýi nanomaterialdarmen, genomdyq jáne derbestendirilgen meditsinamen tanysty.
Joǵary Qamqorshylyq keńesiniń tóraǵasy Oljas Bektenov ǵylym men óndiristi integratsiialaýdyń, sondai-aq qazaqstandyq ǵylymi qoǵamdastyq úshin ǵylymi infraqurylymǵa qoljetimdilikti keńeitý jónindegi naqty mindetterdi atap kórsetti. NU-dyń ónerkásiptik óndiristerge jaqyn ornalasqan óńirlik joǵary oqý oryndarymen ózara is-qimyl jasaý máselelerine erekshe nazar aýdarý qajet.
«Ýniversitet ǵylymi jáne bilim berý resýrstaryn damytýdy kúsheitip, óz ázirlemelerin kommertsiialandyrý úshin ónerkásiptik kásiporyndarmen áriptestikti nyǵaitýy qajet. Munyń barlyǵy ǵylymnyń el ekonomikasyna qosatyn úlesin arttyrýǵa yqpal etedi. Ziiatkerlik mektepterdiń áleýetin óńirlerdegi mektepterdi qoldaý úshin barynsha paidalaný kerek. Bizdiń mindetimiz – balalardy sapaly bilimmen qamtamasyz etý. Biz óz tarapymyzdan qajetti qoldaý kórsetemiz», — dep atap ótti Oljas Bektenov.
Qazirgi ýaqytta NU zerthanalaryndaǵy zertteýshiler toby jasandy intellektini damytý, jasyl tehnologiialardy engizý úshin optoelektronika salasyndaǵy innovatsiialardy zertteý, kúrdeli aýrýlardy diagnostikalaý jáne emdeý múmkindikterin keńeitý máselelerimen ainalysady.
«Biz preparattyń birinshi jáne ekinshi fazalaryn bastapqy zertteýdi aiaqtadyq jáne jaqsy nátijelerge qol jetkizdik. Biz klinikalyq synaqtardy júrgizýdi jalǵastyramyz, onyń barysynda emdelý kezinde maksimaldy áser alý úshin preparattyń eń joǵary tózimdi dozasyna shyǵý kerek», — dedi National Laboratory Astana (NLA) direktory Dos Sarbasov óz komandasynyń qaterli isikke qarsy tiimdi dári jasaý boiynsha jumysy týraly.
«Zerthanamyzda damytyp jatqan negizgi baǵyttardyń biri – qazaqstandyq referensti genomdy zertteý. Iaǵni genomdyq nusqalardyń referensti bazasyn qurý úshin basqa popýliatsiialardan qanshalyqty erekshelenetinimizdi zertteý», — dedi NU janyndaǵy NLA ómir týraly ǵylymdar ortalyǵy direktorynyń mindetin atqarýshy Ainur Aqyljanova.
