Foto: dknews.kz
Qostanai oblysyna jumys sapary barysynda QR Premer-ministri Oljas Bektenov óndiristik nysandardy aralap, óńirdiń áleýmettik-ekonomikalyq damýy jáne infraqurylymdyq mindetterdi sheshý máselelerin talqylady, dep habarlaidy Ult.kz.
Kezdesý barysynda biryńǵai ýaqyt beldeýine kóshý máselesi de kóterildi. Turǵyndar jańa ýaqyt beldeýiniń turmysqa oń yqpal etkenin atap ótti. Bul sheshim tabiǵi ýaqyttyń adamdar densaýlyǵyna paidaly ekenin dáleldegen ǵylymi zertteýler negizinde qabyldanǵan.
Premer-ministr 2017 jyly adamnyń tsirkadtyq yrǵaǵyn zerttegen ǵalymdardyń Nobel syilyǵyn alǵanyn eske saldy. Ol tabiǵi ýaqytpen ómir súrýdiń artyqshylyǵyn dáleldeitin Barselona deklaratsiiasyn da mysalǵa keltirdi.
Foto: Úkimettiń baspasóz qyzmeti
Premer-ministr Qostanai oblysynyń turǵyndaryna jáne barlyq qazaqstandyqtarǵa osy mańyzdy sheshimdi túsinip, qoldaǵany úshin alǵysyn bildirdi.
«Sheshim Qazaqstanda ǵana emes, shetelde de júrgizilgen óte tereń ǵylymi zertteýler negizinde qabyldandy. 2017 jyly amerikalyq ǵalymdar toby adamnyń tsirkadtyq yrǵaǵyn zerttegeni úshin Nobel syilyǵymen marapattaldy. Bul zertteýde ǵalymdar tabiǵi ýaqytta ómir súrgen kezde adam úshin eń jaqsy jáne paidaly ekenin dáleldedi. Sondyqtan qazir álemniń progressivti elderi tabiǵi ýaqyt beldeýine kóshýge umtylýda.
Qazaqstan úshin tabiǵi ýaqyt beldeýi – biz qazir ómir súrip jatqan UTC+5 bolyp tabylady. Buryn ózderińiz biletindei, biz basqa UTC+6 beldeýinde boldyq. Kezinde elimiz direktivalyq tártipte biz úshin tabiǵi emes beldeýge aýystyryldy. Qazir, kerisinshe, biz ýaqytty kún tsikline sáikes keltirdik.
Men biryńǵai ýaqyt beldeýine aýysý keibir adamdarǵa yńǵaisyzdyq týdyrýy múmkin ekenin túsinemin. Aǵza birtindep úirenedi. Osyndai sheshim qabyldandy. Eger óńirlerde qandai da bir qolaisyzdyqtar bolsa, bizdiń eńbek zańnamamyz múmkindik beretin infraqurylymdy, jaryqtandyrýdy, yńǵaily kesteni uiymdastyrý arqyly jumys isteý qajet. Osy máselelerdiń barlyǵyn ári qarai sheshetin bolamyz», — dep atap ótti Premer-ministr.
Sonymen qatar, Jumysshy mamandyqtary jyly aiasynda eńbek jaǵdailaryn jaqsartý jáne qoldaý sharalary talqylandy.
