Oljas Baidildinov Energetika ministrligindegi Adaldyq Alańy jobalyq keńsesiniń basshylyǵynan ketti, dep habarlaidy QazAqparat.
«Qabyldanǵan sheshimge bailanysty Energetika ministrligindegi Adaldyq Alańy jobalyq keńsesiniń basshy retindegi qyzmetimdi aiaqtaimyn jáne ortalyq memlekettik organdar men jergilikti atqarýshy organdardaǵy qoǵamdyq saladaǵy áriptesterime, ministrlik pen Sybailas jemqorlyqqa qarsy is-qimyl agenttiginiń basshylaryna senim kórsetkenderi úshin alǵys aitamyn», - dep jazdy ol Facebook paraqshasynda.
Al Energetika ministrliginiń Instagram-paraqshasynda QR Energetika ministrliginiń Adaldyq Alańy jobalyq keńsesiniń jańa basshysy taǵaiyndalǵany aitylǵan.
«Ministrliktiń Apparat basshysynyń 2022 jylǵy 2 aqpandaǵy №37 buiryǵymen jobalyq keńseniń quramy jańartyldy.
«Adaldyq alańy» jobalyq keńsesiniń basshysy bolyp qazirgi ýaqytta Ministrliktiń ádep jónindegi ýákili bolyp tabylatyn Erlan Medeýuly Sársekeev taǵaiyndaldy.
E.M. Sársekeevtiń memlekettik qurylymdar men jeke sektorda, sonyń ishinde Parlament Májilisiniń appartynda, memlekettik qyzmet isteri agenttiginde, Energetika ministrliginde úlken tájiribesi bar.
Ministrliktiń jobalyq keńsesinde jedel jeli uiymdastyryldy (8(7172) 78-69-38, ol boiynsha kez kelgen adam keńes ala alady», - dep jazylǵan resmi málimette.
Eske salsaq, Oljas Baidildinovtiń eldegi suiytylǵan gaz baǵasyna qatysty aitqan pikirleri halyq tarapynan synǵa ushyraǵan bolatyn.
«Suiytylǵan gazdyń baǵasy baiaǵyda ósýi kerek edi. Bul da basqa taýarlar siiaqty naryqtyq taýar. Onyń negizgi jabdyqtary, materialdar, shyǵyn materialdary – importtalady nemese halyqaralyq baǵalarǵa tikelei bailanysty bolady. Mysaly, metall Qazaqstanda óndiriledi, biraq tolyǵymen álemdik baǵalarǵa táýeldi», - dedi ol.
