QR Bilim jáne ǵylym ministri Ashat Aimaǵambetov endi pándik olimpiadalar kanikýl ýaqytynda ótkizilmeitinin málim etti. Atalǵan ózgeris biyldan bastap kúshine enedi, dep habarlaidy "Ult aqparat".
«Olimpiadalar endi kanikýl kezinde ótkizilmeidi. Óitkeni oǵan sabaqta óte belsendi, jaqsy oqityn oqýshylar qatysady. Biz olardy kanikýl ýaqytyndaǵy demalystan aiyrmaýymyz kerek. Balalar demalýy tiis. Sondyqtan, biyldan bastap olimpiadalardy basqa merzimde ótkizetin bolamyz», – dedi Ashat Aimaǵambetov ministrliktiń apparattyq keńesinde.
Ministr respýblikalyq olimpiadaǵa qatysý úshin oblystarǵa baratyn balalarǵa jaqsy jaǵdai jasalýy kerektigin eskertti. Sondai-aq, ol JOO basshylaryna oqýshylarmen kezdesý jumystaryn uiymdastyrýdy tapsyrdy.
«Respýblikalyq olimpiadaǵa kem degende 1,5 myń daryndy, bilimdi bala qatysady. Daiyndyq barysyn bólek qarastyramyz, degenmen Qaraǵandy jáne Almaty oblystarynda balalardyń qaýipsizdigi, jatatyn jeri, tamaqtanýy boiynsha barlyq jaǵdai jasalsyn. Ekinshiden, ýniversitet basshylaryna tapsyrma: 1,5 myń oqýshy barady, ýniversitetter de olarmen jumys isteýi qajet. Jaz ailarynda ǵana emes, mundai jumys udaiy júrgizilýi kerek», – dedi Ashat Aimaǵambetov.
Sóz sońynda ministr mektep bitirýshilerge ýniversitet tarapynan 50 grant bólgen TarMPÝ ózge JOO-larǵa úlgi retinde atap ótti.
«Mysaly, Taraz memlekettik pedagogikalyq ýniversitetiniń rektory eriktilerge, daryndy balalarǵa 50 grant bóldi. Mine, osyny úlgi retinde aitýǵa bolady. Sondyqtan, kásiptik baǵyt-baǵdar berýge bei-jai qaramaý kerek», – dedi ol.
Esterińizge sala keteiik, osy jyldyń 6 qańtarynda QR BǴM Túrkistan oblysynyń bilim berý salasyndaǵy sapany qamtamasyz etý departamenti oqýshylar arasyndaǵy respýblikalyq olimpiadanyń oblystyq týryn ótkizý barysynda Túrkistan oblysynyń adami áleýetti damytý basqarmasynda jospardan tys tekserý júrgizen edi. Nátijesinde birqatar óreskel buzýshylyq anyqtaldy. Osyǵan orai, Ashat Aimaǵambetov olimpiada, ǵylymi joba baiqaýlary ádil, taza ótýi kerektigin basa aitty.
