2020 jyly Japoniia astanasy – Tokioda ótetin jazǵy Olimpiada oiyndarynda litsenziia alǵan qazaqstandyq sportshylardyń tizimi jariialandy, – dep habarlaidy "Ult aqparat".
Mádeniet jáne sport ministrligi Dene shynyqtyrý jáne sport komitetiniń bergen aqparatyna sáikes, jeńil atletikadan eki sportshyda – Olga Rypakova (úsh attap sekirý) men Georgii Sheikoda (20 shaqyrymdyq júrý) litsenziia bar. Sonymen birge, ashyq sýda júzýden Vitalii Hýdiakov, júzýden Dmitrii Balandin (2 litsenziia), veloshosseden Evgenii Gidich, sadaqpen atýdan (4 litsenziia) Ilfat Abdýlin, Denis Gankin, Sanjar Musaev joldamaǵa ie. Mánerlep júzýden Aleksandra jáne Ekaterina Nemichter el namysyn birige qorǵasa, sporttyq quzǵa órmeleýden Rishat Haibýllin saiys alańyna shyǵady. Grek-rim kúresinen Meirambek Ainaǵulov pen Ashat Dilmuhamedov (60 jáne 77 keli salmaqta) Olimpiadaǵa barady. Sol sekildi, áielder kúresinen 50 jáne 76 keli salmaqta Valentina Islamova men Elmira Syzdyqova Tokioǵa daiyndalyp jatyr. Erkin kúresten Nurislam Sanaev (57 keli), Dáýlet Niiazbekov (65 keli), Daniiar Qaisanov (74 keli), Erǵali Álisher (97 keli), sporttyq gimnastikadan Milad Karimi, stendt atýdan Sársengúl Rysbekova, myltyqpen atýdan Iýrii Iýrkov, qazirgi bessaiystan Elena Potapenko men Pavel Iliashenko Olimpiada litsenziiasyn ielenip otyr.
Aita ketsek, osy jyldyń sońyna deiin ulttyq qurama sportshylary 28 litsenziialyq Álem chempionaty, 19 Aziia birinshiligi men 12 álemdik irikteý týrnirine qatysady. Al 2020 jyly 3 Álem chempionaty, 19 Aziia jáne 18 álemdik týrnirlerde óner kórsetedi. Josparlanǵan jarystardyń qorytyndysy boiynsha, 2016 jylǵy Olimpiada oiyndarynan kem bolmaityn litsenziia alý josparlanyp (sporttyń 32 túrinen 105 litsenziia) otyr.
Budan buryn habarlaǵanymyzdai, 2020 jyly Tokioda ótetin jazǵy Olimpiada oiyndaryna Ulttyq qurama enshisinde ázirge sporttyń 14 túrinen 25 litsenziia bar. Mádeniet jáne sport ministrligi Sport jáne dene shynyqtyrý isteri komitetiniń tóraǵasy Serik Sápiev buǵan deiin Tokio Olimpiadasynda medal kútetin sportshylardy ataǵan bolatyn.
